የኢትዮጵያ ብሔራዊ ባንክ የውጭ ምንዛሬ እጥረትን ለመቅረፍና ገበያውን ለማረጋጋት ዛሬ ባካሄደው ልዩ ጨረታ 500 ሚሊዮን የአሜሪካ ዶላር ለንግድ ባንኮች ማከፋፈሉን አስታወቀ። ይህ መጠነ-ሰፊ የገንዘብ ስርጭት የኢትዮጵያ ብር በዶላር ያለውን አማካይ የምንዛሬ ዋጋ 154.81 እንዲሆን አድርጎታል።
በዚህ ልዩ ጨረታ ላይ 31 ባንኮች የተሳተፉ ሲሆን፣ ባንኮቹ የጠየቁት ጠቅላላ የገንዘብ መጠን 592.3 ሚሊዮን ዶላር ደርሷል።
ይህም የቀረበው የዶላር መጠን ካለው ፍላጎት ጋር ሲነፃፀር 84 በመቶ የሚሆነውን መሸፈን መቻሉን ያሳያል። ከቀረቡት ባንኮች መካከል 25ቱ በጨረታው አሸናፊ በመሆን የሚፈልጉትን የውጭ ምንዛሬ ማግኘት ችለዋል።
የኢኮኖሚ ባለሙያዎች እንደሚሉት፣ ይህ የአንድ ቀን ከፍተኛ የገንዘብ አቅርቦት ባንኩ በገበያ ላይ የተመሰረተውን የምንዛሬ ፖሊሲ ለማስቀጠል የሚያስችል በቂ የመጠባበቂያ ክምችት እንዳለው ለገበያው ያሳየበት እርምጃ መሆኑ ተጠቁሟል።
በጨረታው ዝቅተኛው የመሸጫ ዋጋ 154.24 ሆኖ የተመዘገበ ሲሆን፣ ከፍተኛው ደግሞ 154.99 ሆኖ ተመዝግቧል። ይህም የምንዛሬ ተመኑ ካለፈው ሳምንት መደበኛ ጨረታ ጋር ሲነፃፀር መጠነኛ መረጋጋት እያሳየ መሆኑን ያመላክታል።