በተመድ ስብሰባ ላይ አሜሪካ በማዱሮ ጉዳይ ላይ በብርቱ ትችት ተሰነዘረባት

​ከምንጊዜውም በላይ ውጥረት በነገሰበት የተባበሩት መንግሥታት ድርጅት (ተመድ) የጸጥታው ምክር ቤት ስብሰባ ላይ በአሜሪካ ላይ ጠንካራ ትችቶች ቀርበዋል።

በኒውዮርክ ማንሃተን በሚገኘው የተመድ ዋና መሥሪያ ቤት የተካሄደው ይህ ስብሰባ፣ ማዱሮ እና ባለቤታቸው ሲሊያ ፍሎሬስ በፌዴራል ፍርድ ቤት በቀረቡበት ወቅት የተከናወነ ነው።

​የጸጥታው ምክር ቤት በቬንዙዌላ ሁኔታ ላይ የመከረበትን ስብሰባ ሲያጠናቅቅ፣ አሜሪካ የከባድ ትችት ኢላማ ሆናለች።

በምክር ቤቱ የአስቸኳይ ጊዜ ስብሰባ ላይ፣ የአሜሪካ የቅርብ አጋሮች እንኳ ሳይቀሩ ድርጊቱን “የዓለም አቀፍ ሕግ ጥሰት” ሲሉ በኮነኑት ሁኔታ፣ በቬንዙዌላው ፕሬዝዳንት ኒኮላስ ማዱሮ እስር እና በሉዓላዊት ሀገር ላይ በተፈጸመው ወታደራዊ ወረራ ምክንያት አሜሪካ ተወግዛለች።

​በተመድ የፈረንሳይ ምክትል አምባሳደር ጥቃቱን እና የማዱሮን እስር በማውገዝ፣ ድርጊቱ የዓለም አቀፉን ሥርዓት መሠረት የሚንድ መሆኑን አፅንዖት ሰጥተዋል።

​የተመድ ቻርተር መጣስ

​የተባበሩት መንግሥታት ድርጅት ዋና ጸሐፊ አንቶኒዮ ጉተሬዝ፣ የዶናልድ ትራምፕ አስተዳደር የተመድ ቻርተርን ጥሷል ብለዋል። የኮሎምቢያ አምባሳደር በበኩላቸው ይህ እርምጃ አሜሪካ በቀጠናው ጣልቃ ትገባ የነበረበትን ያለፈ ታሪክ የሚያስታውስ መሆኑንና አሜሪካ ዓለም አቀፍ ሰላምና ደህንነትን እያናጋች መሆኑን ገልጸዋል።

​ሩሲያ እና ቻይና ማዱሮ እና ባለቤታቸው እንዲፈቱ የጠየቁ ሲሆን፣ አሜሪካ ከማንኛውም ተጨማሪ ወታደራዊ እርምጃ እንድትታቀብ ጥሪ አቅርበዋል።

​ጉተሬዝ በስብሰባው ላይ ሲናገሩ፦ “በሀገሪቱ ውስጥ ሊፈጠር የሚችለው አለመረጋጋት መባባስ፣ በቀጠናው ላይ ሊኖረው የሚችለው ተፅዕኖ እና በሀገራት መካከል በሚኖር ግንኙነት ላይ ሊያሳድር የሚችለው መጥፎ አርአያነት በእጅጉ ያሳስበኛል” ብለዋል።

ወደ ዲፕሎማሲያዊ ውይይት እንዲመለሱ እና ለዓለም አቀፍ ደንቦች ተገዥ እንዲሆኑም ጥሪ አቅርበዋል።

​የሰኞው ለሊቱ የምክር ቤት ስብሰባ፣ የተመድ ቋሚ አባል የሆነችው አሜሪካ በቬንዙዌላ ላይ የወሰደችውን እርምጃ አስመልክቶ በቅርብ ጊዜ ውስጥ የተካሄደ ሁለተኛው ስብሰባ ነው።

ሌሎች ሀገራት ይህ ድርጊት የዓለምን ሥርዓት መረጋጋት እና ደህንነት አደጋ ላይ የሚጥል ነው ይላሉ። ባለፈው ጥቅምት ወርም፣ አሜሪካ “ወደ ግዛቴ ዕፅ እያጓጓዙ ነው” ባለቻቸው የቬንዙዌላ መርከቦች ላይ በፈጸመችው ገዳይ ጥቃት ምክር ቤቱ አስቸኳይ ስብሰባ ማድረጉ ይታወሳል።

​በተመድ የአሜሪካ አምባሳደር የማዱሮን ከሥልጣን መወገድ በመከላከል፣ አሜሪካ ከቬንዙዌላ ወይም ከሕዝቧ ጋር ጦርነት ላይ አይደለችም ብለዋል። ማዱሮን የሀገር መሪ ሳይሆኑ “የዕፅ ወንጀለኛ” ሲሉም ጠርተዋቸዋል።

አምባሳደር ማይክ ቮልዝ “ሀገሪቱን እየተቆጣጠርን አይደለም፤ ይህ የሕግ ማስከበር ዘመቻ ነበር” ሲሉ በአስቸኳይ ስብሰባው ላይ ተናግረዋል።

​ዓለም አቀፍ ደንቦችን ማዳከም

​የፈረንሳይ ምክትል አምባሳደር ጄይ ዳርማዲካሪ የማዱሮን አገዛዝ ቢተቹም፣ ወታደራዊ ዘመቻው ዓለም አቀፍ ደንቦችን እና መርሆችን የሚንድ መሆኑን ጠቁመው፣ ቬንዙዌላውያን የገዛ ፖለቲካዊ እጣ ፈንታቸውን ራሳቸው መወሰን አለባቸው ብለዋል። “ለኒኮላስ ማዱሮ እስር ምክንያት የሆነው ወታደራዊ ዘመቻ፣ አለመግባባቶችን በሰላማዊ መንገድ የመፍታት እና ኃይልን አለመጠቀም ከሚሉ መርሆዎች ጋር የሚጋጭ ነው” ብለዋል።

​የላቲን አሜሪካ ሀገራትም ከፍተኛ ስጋታቸውን ገልጸዋል። ከ15ቱ የምክር ቤቱ አባላት እና ከቬንዙዌላ በተጨማሪ ብራዚል፣ አርጀንቲና፣ ሜክሲኮ፣ ቺሊ፣ ኩባ፣ ኒካራጓ እና ኢራንን ጨምሮ  ደርዘን የሚጠጉ ሀገራት በስብሰባው ላይ ለመሳተፍ እና ንግግር ለማድረግ ጥያቄ አቅርበዋል።

​በተመድ የሩሲያ አምባሳደር ቫሲሊ ኔቤንዚያ “የአሜሪካው ዓለም አቀፍ ፖሊስ ራሱን እንደገና ለመጫን እየሞከረ ነው” ያሉ ሲሆን፣ ዓለም አቀፉ ማኅበረሰብ በአንድነት በመቆም “የአሜሪካን ወታደራዊ የውጭ ፖሊሲ መሣሪያዎች” ውድቅ እንዲያደርግ ጥሪ አቅርበዋል።

​ፕሬዝዳንት ትራምፕ አሜሪካ በሌሎች ሀገራት ላይም እርምጃ ልትወስድ እንደምትችል ፍንጭ ሰጥተዋል፤ ከእነዚህም መካከል ኮሎምቢያ፣ ሜክሲኮ እና የዴንማርክ ከፊል ራስ-ገዝ ግዛት የሆነችው ግሪንላንድ ይገኙበታል።

​በተመድ የቬንዙዌላ አምባሳደር ሳሙኤል ሞንካዳ በስብሰባው ሁሉ በቁጭት ተቀምጠው ነበር። በካራካስ የተፈጸመው የአሜሪካ ዘመቻ ሌሎች ሀገራትም ተመሳሳይ እርምጃ እንዲወስዱ በር የሚከፍት ነው ብለዋል።

“የሀገር መሪን ማፈን እና የቦምብ ጥቃት መፈጸም ችላ ከተባለ፣ ለዓለም የሚተላለፈው መልዕክት አስከፊ ነው፤ ይህም ሕግ እንደ ምርጫ የሚታይ መሆኑንና ኃይል የዓለም አቀፍ ሥርዓት ብቸኛው ዳኛ መሆኑን ያሳያል” ሲሉ ሞንካዳ ተናግረዋል።