በአለርት ሆስፒታል በአይጥ አማካኝነት የቲቢ ቫይረስ ያለበት ሰው እየተለየ ነው

አይጥን ተጠቅሞ አክታን በማሽተት በደቂቃዎች ልዩነት ቲቢ ቫይረስ ያለበትን ሰው የመለየት አገልግሎት እየሰጠ መሆኑን አለርት ሆስፒታል አስታወቀ፡፡

በሆስፒታሉ የቲቢ ምርምር ክፍል ኃላፊ  ዶክተር ንጉሴ በየነ ለኢትዮጵያ ፕሬስ ድርጅት እንደገለጹት፣ በቴክኖሎጂ የታገዘ የሕክምና አገልግሎትን በማዘመን በአፖፖ አይጦች የታገዘ የቲቢ ቫይረስ ምርመራ በስራ ላይ እየዋለ ነው፡፡

በአርማወር ሐንሰን የምርምር ማዕከል አምስት የአፖፖ አይጥ ዝርያዎች መኖራቸውን ጠቅሰው፣ አክታን በማሽተት ቲቢ ቫይረስ ያለበትን ሰው በደቂቃዎች ልዩነት እየለዩ እንደሚገኝ ገልጸዋል፡፡
እስከ ሁለት ሰዓት የሚፈጀውን በአጉሊመነፅር የሚታገዘው የቲቢ ቫይረስ ምርመራ አይጦቹ በደቂቃ ልዩነት የተጠርጣሪውን የአክታ ናሙና በማሽተት ቫይረሱ እንዳለበትና እንደሌለበት ይለያሉ ብለዋል።

አይጦቹ ይህን ብቃት ያፈሩት ተወልደው አይናቸው ከበራ ከአራት ሳምንት በኋላ ለዘጠኝ ወራት በታንዛኒያ ስልጠና ወስደው መሆናቸውን በመግለጽ፣ አስፈላጊውን ፈተና ከወሰዱ በኋላ ቲቢ ቫይረስን የመለየት ተግባር ላይ መሰማራታቸውን አስረድተዋል።

አይጦቹ የአክታ ናሙናን አሽትተው  አንድ ተጠርጣሪ ቫይረሱ ካለበት በጣቶቻቸው መላልሰው በመቧጨር ቫይረሱ እንዳለበት ያሳያሉ ያሉት ኃላፊው፣ ተጠርጣሪው ቫይረሱ ከሌለበት ደግሞ አክታውን ካሸተቱ በኋላ ሳይቧጭሩ በማለፍ የመለየት ስራቸውን የሚያከናውኑ ይሆናል።

የሕክምና ባለሞያዎቹ ሂደቱን በመከታተል ቫይረሱ የተገኘበትን ተጠርጣሪ መድኃኒት እንዲጀምር እንደሚያደርጉ ገልጸዋል፡፡

አገልግሎቱ ከተጀመረበት ጊዜ አንስቶ ከአዲስ አበባ ጤና ጣቢያዎች የተወሰዱ 170ሺ የአክታ ናሙናዎች ውስጥ 3 ሺህ ቫይረሱ በውስጣቸው እንዳለ በ አፖፖ አይጦች መረጋገጡን ተናግረዋል፡፡

አይጦቹ 1 ነጥብ 5 ኪሎግራም የሚመዝኑ ሲሆን እስከ ስምንት ዓመት ዕድሜ እንደሚኖሩ ጠቅሰው፣ የአንድ አፖፖ አይጥ ዋጋ አምስት ሺህ ዩሮ እንደሆነ ገልፀዋል።

አምስቱም አይጦች በእርዳታ መልክ ከቤልጅዬም ግብረሰናይ ድርጅት የተሰጡ እንደሆነና  በቅርብም አምስት ተጨማሪ  የአፖፖ አይጦች ወደ አገር  ውስጥ እንደሚገቡ ጠቁመዋል።

ጋዜጣ ፕላስ