የኢትዮጵያ መንግሥት በ2024 ዓ.ም. ዋናው ዕዳ የሚከፈልበት የአንድ ቢሊዮን የአሜሪካን ዶላር ቦንድ ዕዳዋን ለማዋቀር ያደረገው ወሳኝ ጥረት ከቁልፍ የቦንድ ባለቤቶች ቡድን ጋር የተደረገው ድርድር ያለ ስምምነት መጠናቀቁ ተሰምቷል።
ኢትዮጵያ ለዚህ ብድር በየዓመቱ 6.625% ወለድ ለመክፈል ተስማምታ እንደነበር ይታወቃል። የገንዘብ ሚኒስትር እንዳስታወቀው በመስከረም 15 እና ጥቅምት 3 ቀን 2018 ዓ.ም መካከል የተካሄደው ውይይት በሁለቱ ወገኖች የቀረቡትን የመጨረሻ የዕዳ ማዋቀር ሃሳቦች መካከል ያለውን ልዩነት ማጥበብ አልተቻለም።
ሚኒስቴሩ ድርድሩ በዚህ ጊዜ ሳይሳካ ቢቀርም፣ “ሰፊ መሻሻል” መመዝገቡን ገልጾ፣ ውይይቱ ወደፊት እንደሚቀጥል ተስፋውን አጠናክሯል።
ሁለቱም ወገኖች ለአዲሱ ቦንድ እትም ዋናውን ዕዳ በ15% ቅናሽ በማድረግ 850 ሚሊዮን ዶላር እንዲሆን፣ የክፍያ የመጨረሻ ቀኑ እኤአ ሐምሌ 15 ቀን 2029 እንዲሆን እና ያለፉት ሶስት የወለድ ክፍያዎች በሙሉ 99.375 ሚሊዮን ዶላር እንዲከፈሉ በሚለው ላይ ተቀራርበው ነበር።
ሆኖም፣ ቁልፍ ልዩነቶች በተለይም በቀረበው የእሴት መልሶ ማግኛ መሣሪያ እና “የኪሳራ ቅነሳ” ውሎች ዙሪያ ቀርተዋል።
ሁለቱም በኢትዮጵያ የወጪ ንግድ ላይ የተመሠረተ የእሴት መልሶ ማግኛ መሣሪያ ቢጠቁሙም ፣ ባለቤቶቹ ከተጨማሪ የወጪ ንግድ በ4 ዓመታት ውስጥ 4.75% ከፍተኛ ክፍያ ሲፈልጉ፣ የኢትዮጵያ መንግሥት ደግሞ ለረጅም ጊዜ (እስከ 2035/36) የሚቆይ እና በ1.5% የተገደበ ዝቅተኛ ክፍያ አቅርቧል።
CapitalNews