የሶማሊላንድ ማዕከላዊ ባንክ ኃላፊ የሆኑት አብዱልናስር አህመድ ሂርሲ፣ የበርበራ ወደብን ለኢትዮጵያ ንግድ ክፍት ለማድረግ የተጀመረው ስምምነት እንዲፋጠን የባንክና የኢንሹራንስ ፕሮቶኮሎች በአስቸኳይ እንዲሻሻሉ አሳስበዋል።

ይህ ጥሪ የቀረበው አዲስ አበባ ላይ፣ ከኢትዮጵያ ብሄራዊ ባንክ ገዥ አቶ ማሞ ምህረቱ ጋር ባደረጉት ውይይት ነው። ሁለቱ ባለሥልጣናት የሁለቱን ሀገራት የንግድ እና የባንክ ግንኙነት ለማጠናከር በሚቻልበት የገንዘብ እና ኢኮኖሚ ትብብር ዙሪያ ተወያይተዋል።

በውይይታቸውም የክፍያ እና ማጣሪያ ስርዓቶች፣ የውጭ ምንዛሪ አጠቃቀም፣ የንግድ ፋይናንስ፣ የሕገወጥ ገንዘብ ዝውውር መከላከል፣ የፊን ቴክ ፍቃድ አሰጣጥ እና የውጭ ምንዛሪ አሰራር ላይ ትብብር ለማድረግ መስማማታቸው ተገልጿል።

አቶ ማሞ በበኩላቸው፣ የውጭ ጉዳይ ሚኒስቴርን በማነጋገር ስምምነቱ እንዲፋጠን ቃል የገቡ ሲሆን፣ ሁለቱም ኃላፊዎች የጋራ የኢኮኖሚ ዕድገትን እና የክልልን መረጋጋት ለማጎልበት የትብብሩን አስፈላጊነት አጽንኦት ሰጥተዋል።

CapitalNews