ተቋማት የመረጃ ጥበቃ ፖሊሲ ሊኖራቸው ይገባል

የሳይበር ጥቃት በግለሰቦች መረጃ ላይ ጉዳት ከማድረስ ባለፈ፣ በተቋማት ላይ ከፍተኛ የገንዘብ ኪሳራና የስራ መስተጓጎል ሊያስከትል እንደሚችል ተገልጻል፡፡

የኢትዮጵያ ሳይበር ደህንነት ማህበር ፕሬዚዳንት ዶ/ር ብርሃኑ በየነ በኢትዮጵያ የሚገኙ ተቋማት ለስራቸው አስፈላጊ የሆነውን መረጃ ብቻ በጥንቃቄ ማሰባሰብና የግል መረጃን በአግባቡ መጠበቅ አለባቸው ሲሉ ተናግረዋል፡፡

በሀገሪቱ ብዙ ተቋማት ለስራቸው የማያስፈልጋቸውን መረጃ ጭምር የማሰባሰብ ልምድ እንዳላቸው አንስተው ለተለያዩ የሳይበር ጥቃቶች የሚጋለጡበትን ዕድል ሊኖር እንደሚችል ገልጸዋል፡፡

መረጃ የሚያሰባስቡ ተቋማት መረጃው የት፣ ለምን ያህል ጊዜ እንደሚቀመጥና ማን ሊያገኘው እንደሚችል የሚያስቀምጥ ግልጽ የመረጃ ጥበቃ ፖሊሲ ሊኖራቸው እንደሚገባም አመልክተዋል።

በተጨማሪም የግል መረጃ የሚሰጡ ሰዎች መረጃቸው ለምን እንደሚሰበሰብና እንዴት ጥቅም ላይ እንደሚውል በቂ ግንዛቤ እንዲኖራቸው ማድረግ ወሳኝ መሆኑን ገልጸዋል።
የሳይበር ጥቃት በግለሰቦች መረጃ ላይ ጉዳት ከማድረስ ባለፈ፣ በተቋማት ላይ ከፍተኛ የገንዘብ ኪሳራና የስራ መስተጓጎል ሊያስከትል እንደሚችል ዶ/ር ብርሃኑ ጠቁመዋል ።