አርቴታ አርሰናል “ብዙ የሚማረው ነገር እንዳለ” አምኖ ተናግሯል

የአርሰናሉ አሰልጣኝ ሚኬል አርቴታ፣ ቡድኑ በቻምፒዮንስ ሊግ ከስላቪያ ፕራግ ጋር ባደረገው ጨዋታ 2 ለ 1 በሆነ ጠባብ ውጤት ካሸነፈ በኋላ፣ አሁንም ቡድኑ “ብዙ የሚማረው ነገር እንዳለው” ያምናል።

የፕሪሚየር ሊጉ ሻምፒዮን ቡድን በምርጥ ብቃቱ ላይ ባይገኝም፣ በፕራግ ሶስቱንም ነጥቦች ማሳካት ችሏል። ኖኒ ማዱዌኬ አርሰናልን ቀድሞ መሪ እንዲሆን ያደረገ ሲሆን፣ አጥቂው ቪክቶር ዮከሬሽ ከግማሽ ሰዓት ጨዋታ በኋላ መሪነቱን ወደ 2 ለ 0 ከፍ አድርጎታል።

ስላቪያ በ90ኛው ደቂቃ በዊክቶር ኖዋክ አማካኝነት ግብ በማስቆጠር ጨዋታውን ውጥረት ውስጥ አስገብተውት ነበር፤ ነገር ግን የአርቴታ ቡድን እድለኛ ሆኖ፣ ያ ግብ ለተጋጣሚው ቡድን የማጽናኝ ብቻ ሆኖ ቀርቷል።

ከጨዋታው በኋላ ለቲኤንቲ ስፖርት አስተያየቱን የሰጠው አርቴታ፣ በቡድኑ አፈጻጸም ሙሉ በሙሉ አልረካም፤ እንዲሁም ቡድኑ አሁንም “ብዙ የሚማረው ነገር እንዳለ” አምኗል።

“በቻምፒዮንስ ሊግ ከሜዳ ውጭ ማሸነፍን ሁሌም ልናደንቀው ይገባል፤ ምክንያቱም በጣም ከባድ ነው። ጨዋታው በሁለቱ አጋማሾች እጅግ የተለየ ነበር፣” ብሏል።

“በመጀመሪያው አጋማሽ ሶስት ወይም አራት ግቦችን ማስቆጠር ነበረብን፣ ነገር ግን አልቻልንም። በሁለተኛው አጋማሽ መጀመሪያ ላይ ግን ተጭነውን ነበር፤ አጨዋወታችንም የተዝረከረከ ነበር፣ ኳሶችንም በቀላሉ ለተጋጣሚ ሰጥተናል።”

“በመቀጠልም ከፍተኛ ጫና ውስጥ ገብተን ተቸግረናል። ብዙ የሚማረው ነገር አለ።በመጀመሪያው አጋማሽ ተጨማሪ ግቦችን ማስቆጠር ነበረብን፤ ያ ካልሆነ ደግሞ በሁለተኛው አጋማሽ ያንን ማድረግ ይጠበቅብን ነበር።”

“ስድስት ቅያሬዎችን አድርገናል፤ ነገር ግን በእጃችን ያሉ ተጫዋቾች ያላቸውን ጥራት እናውቃለን። በቡድኑ ውስጥ የጎደለ ነገር ነበር ወይ አላውቅም፣ ነገር ግን እንደገና ተመሳሳይ ውሳኔዎችን እወስን ነበር።”

“ቡድኑ እስካሁን ያሳየውን አፈጻጸም አደንቃለሁ፤ ከሜዳ ውጭ ያደረግናቸው ጨዋታዎች ቁጥርም 11 ደርሷል”ብሏል።