ኢትዮጵያ 35 ቢሊዮን ዶላር ገቢ ውስጥ  ወደ ሀገር ውስጥ የገባው 7.2 ቢሊዮን ዶላር ብቻ ነዉ

ኢትዮጵያ ከዲያስፖራው በሚላክ ገንዘብ በዓመት ማግኘት ከትምችለው 35 ቢሊዮን ዶላር ውስጥ ወደ ሀገር ውስጥ የገባው 7.2 ቢሊዮን  ዶላር (22 በመቶ) ብቻ መሆኑን የኢትዮጵያ ንግድ ባንክ አስታወቀ።

የኢትዮጵያ ንግድ ባንክ ፕሬዝዳንት አቶ አቤ ሳኖ፤ 78 በመቶው ያህሉ ወደ ሀገር ውስጥ ያልገባው ኢትዮጵያ የዳያስፖራውን የገንዘብ ዝውውር (ሬሚታንስ) አቅም አሟጥጣ መጠቀም ባለመቻሏ ነው ሲሉ ገልጸዋል።

አቶ አቤ ይህን የተለጹት፤ በደቡብ አፍሪካ ፕሪቶሪያ ከተማ ከሚገኙ ኢትዮጵያውያን እና ትውልደ ኢትዮጵያውያን ጋር ባደረጉት የውይይት መድረክ ነው።

የባንኩ ፕሬዝዳንት፤ ኢትዮጵያውያን እና ትውልደ ኢትዮጵያውያን አንድነታቸውን በማጠናከር በሀገራቸው ኢንቨስት የሚያደርጉበት ጊዜ አሁን ነው ብለዋል።

በመሆኑም ዳያስፖራው በሬሚታንስ፣ በኢንቨስትመንትና በሌሎች ዘርፎች እያደረጉ ያለውን አስተዋጽኦ ይበልጥ እንዲያጠናክሩ የኢትዮጵያ ንግድ ባንክ ከጎናቸው ሆኖ አስፈላጊውን ድጋፍ እንደሚያደርግ አስታውቀዋል።

የኢትዮጵያ ንግድ ባንክ በ2018 ዓ.ም ለዳያስፖራው ማህበረሰብ 50 ቢሊዮን ብር ለማበደር ዝግጅት መደረጉንም አስታውሰዋል።