የግሉ ዘርፍ መንግስት ከንግዱ እንዲወጣ ጠየቀ

የግሉ ዘርፍ መንግስት በቀጥታ ከንግድና ከንግድ እንቅስቃሴዎች ሙሉ በሙሉ እንዲወጣ ተጠይቋል። ይህ ጥያቄ የመጣው በስፋት እየተስተዋለ ባለው ሙስና፣ ከፍተኛ የቢሮክራሲ ችግሮች እና የማይታወቅ የቁጥጥር አካባቢ ምክንያት ሲሆን፣ እነዚህም ለኢንቨስትመንትና ለኢኮኖሚ ዕድገት ዋነኛ እንቅፋት እንደሆኑ ተገልጿል።

የዘርፉ ተወካዮች የመንግሥት ጫናዎች መቆም እንዳለባቸው አሳስበው፣ ዋናው ጥያቄ መንግሥት በንግድ መስክ ያለውን ሰፊ ተሳትፎ እንዲያቆም መሆኑን ጠቁመዋል። “መነገድ ያለብን እኛ ነን። ፍቃድ ያለው መነገድ ያለበት የኛ ባለሀብት ነው ለባለሀብቱ ለኢንቨስተሩ ምቾት መስጠት አለበት” ብለዋል።

“የንግዱ ማህበረሰብ ሚና ለሰላም ግንባታ” በሚል መሪ ቃል በአዲስ አበባ ንግድና ዘርፍ ማህበራት ምክር ቤት አማካኝነት በተዘጋጀው መድረክ ላይ፣ የዘርፉ ነጋዴዎች ንግድ የፈቃድ ባለቤቶች ህጋዊ መብት እንደሆነ አጽንኦት ሰጥተው፣ መንግስት የሚያደርገውን ጫና “ማቆም” እንዳለበት ገልጸዋል።

በሌላ በኩል የንግድ ደንቦች ግልጽ አለመሆን እና ብዙ ጊዜም ቅጣት የሚያስከትል መሆኑን የተገለፀ ሲሆን፣ መመሪያዎች የንግዱ ማህበረሰብ ሳይሳተፍ የሚወጡና እንደ “መዶሻ እና መጋዝ” እየሰሩ እንደሆነ ተጠቁሟል።

ዋናው ጥያቄ “ከንግዱ ሙሉ በሙሉ እንዲወጣ” የሚል ሲሆን፣ ፈቃድ ያለው የግሉ ዘርፍ የንግድና የንግድ እንቅስቃሴ ዋና አንቀሳቃሽ መሆን እንዳለበት አጽንኦት ተሰጥቶበታል።

የንግዱ ማኅበረሰብ መሪዎች ኢንቨስትመንትን ለመሳብ እና የህግ የበላይነትን ለማስፈን የፍትህ ሥርዓቱን ቴክኖሎጂ በመጠቀም እንዲያሻሽል፣ የግጭት አፈታት እንዲፋጠን እንዲሁም በግጭት ለሚደርስ ኪሳራ የተሻለ የደህንነት ዋስትናና ካሳ እንዲሰጥ ጠይቀዋል።

capital news

ዝርዝሩን ያንብቡ