ከሞት በኋላ ኩላሊትና ጉበትን ጨምሮ የተለያዩ የአካል ክፍሎች ልገሳና ንቅለ ተከላ ህክምናን ለማስጀመር ዝግጅት እየተደረገ መሆኑ ተገለጸ፡፡
የኢትዮጵያ ደምና ህብረ ህዋስ ባንክ አገልግሎት ምክትል ዋና ዳይሬክተር ዶክተር ጤናዬ ደምሴ፣ በኢትዮጵያ ከሞት በኋላ የአካል ክፍል ልገሳና ንቅለ ተከላ በህግ የተፈቀደ ቢሆንም በተደራጀ መልኩ ወደ ስራ አለመግባቱን ገልጸዋል፡፡
ህክምናውን ለማስጀመር የሚያገለግሉ መሳሪያዎችና ማሽኖች እየተደራጁ እንዲሁም በቂ የሰለጠነ የሰው ሀይል እንዲኖር እየተሰራ መሆኑን ጠቅሰዋል፡፡
ንቅለ ተከላው በሆስፒታሎች የሚከናወን በመሆኑ ሆስፒታሎችን ዝግጁ ለማድረግ ከባለሙያዎች ጋር ውይይት እየተደረገ ሲሆን መመሪያም መዘጋጀቱን አስታውቀዋል፡፡
በመመሪያው መሠረት የአካል ክፍል ለጋሽ ፈቃደኝነቱን በጽሁፍ ማረጋገጥ ወይም በኑዛዜ ማስቀመጥ የሚችል ሲሆን፣ ፈቃዱን በማንኛውም ጊዜ የማንሳት መብትም አለው፡፡ ለጋሹ ግን አካል ክፍሉን የሚቀበለውን ሰው የመምረጥ መብት እንደሌለው ተመላክቷል፡፡
