“የቻይና-አፍሪካ የምርምር ማዕከል”በአዲስ አበባ ዩኒቨርሲቲ ሊከፈት ነው

አዲስ አበባ ዩኒቨርሲቲ ከቻይና-አፍሪካ ኢንስቲትዩት ጋር በመተባበር “የቻይና-አፍሪካ የምርምር ማዕከል” በአዲስ አበባ ለመክፈት የሚያስችል ስምምነት ተፈራርሟል።

ይህ ማዕከል በሁለቱ ወገኖች መካከል ያለውን አካዳሚያዊ ትብብር፣ የባህል ልውውጥ እና የጋራ ምርምሮችን ለማጠናከር ያለመ ሲሆን፤ የዩኒቨርሲቲው ፕሬዝዳንት ሳሙኤል ክፍሌ (ዶ/ር) እንደገለጹት፣ ማዕከሉ የዘመናትን የንግድና የዲፕሎማሲያዊ ግንኙነት ውጤት ነው።

የቻይና-አፍሪካ ኢንስቲትዩት ፕሬዝዳንት ክቡር ዬ ሃይሊንግ፣ ማዕከሉ በቻይና መንግሥት ከሚደገፉ 25 ዓለም አቀፍ የምርምር ማዕከላት አንዱ መሆኑን ገልጸዋል።

ይህ ስትራቴጂካዊ እርምጃ በቻይና እና በኢትዮጵያ መካከል ያለውን ሁሉን አቀፍ አጋርነት ይበልጥ በማጠናከር፣ አዲስ የእውቀትና የልማት ምዕራፍ እንደሚከፍት ይጠበቃል።