የኢትዮጵያ ብሔራዊ ቴአትር 71ኛ ዓመቱን አከበረ

የኢትዮጵያ ብሔራዊ ቴአትር 71ኛ ዓመት የምሥረታ በዓሉን አንጋፋና ወጣት የጥበብ ባለሙያዎችን እንዲሁም የጥበብ አፍቃሪያን ባሳተፈ ልዩ ሥነ-ሥርዓት አክብሯል።

በ1948 ዓ.ም. «ቀዳማዊ ኃይለ ሥላሴ ቴአትር» በሚል ስያሜ የተመሠረተው ተቋሙ፣ ላለፉት 71 ዓመታት በቴአትር፣ በሙዚቃና በሥነ-ጽሑፍ የሀገሪቱን ባህልና እሴቶች በማስተዋወቅ እና የዘመናዊ ኪነ-ጥበብ እድገትን በመደገፍ ረገድ ጉልህ ሚና ሲወጣ ቆይቷል።

የተቋሙ ዋና ዳይሬክተር ባረከ ታደሠ እንደገለጹት፣ በህንድ ኒው ዴሊ በተካሄደው የBRICS ዓለም አቀፍ የቴአትር ፌስቲቫል መሳተፉ፣ ተቋርጦ የቆየው የአዲሱ ሕንፃ ግንባታ መጀመሩ፣ አዲሱ የኪነ-ጥበብ ፖሊሲ ለማጽደቅ መድረሱና ዓለም አቀፍ ደረጃውን የጠበቀ የድምፅ ሲስተም ሥራ ላይ መዋሉ የቅርብ ጊዜ ስኬቶቹ ናቸው።

በበዓሉ ላይ የተገኙት የባህልና ቱሪዝም ሚኒስትሯ ሰላማዊት ካሳ፣ ብሔራዊ ቴአትር ለሀገራዊ ማንነትና ለትውልድ ግንባታ ያበረከተውን አስተዋጽኦ አድንቀው፣ እንደ ሎሬት ጸጋዬ ገብረመድኅንና ተባባሪ ፕሮፌሰር ተስፋዬ ገሰሰ ያሉ የጥበብ ባለውለታዎችን አስታውሰዋል።

በዝግጅቱ ላይ ሙዚቃዊ ቴአትር፣ የብዝኃ ባህል ውዝዋዜ፣ የፋሽን ትርኢትና የተቋሙን የ71 ዓመታት ታሪክ የሚዳስስ ዘጋቢ ፊልም ቀርበዋል።

የብሔራዊ ቴአትር 71 ዓመታት ጉዞ የሀገሪቱን የጥበብ ታሪክና ባህላዊ ማንነት በመጠበቅ ያበረከተውን ሚና ያሳያል። ተቋሙ ይህን ታሪካዊ አሻራ ለማስቀጠል አዳዲስ ችሎታዎችን ማፍራት፣ ወጣት የጥበብ ባለሙያዎችን ማበረታታትና የኪነ-ጥበብ ሥራዎችን ወደ ዓለም አቀፍ መድረክ ማስፋት ይጠበቅበታል።