የእስራኤል ጠቅላይ ሚኒስትር ቤንያሚን ኔታንያሁ ከታሪካዊቷ የግብፅ ምድር የሚሰማው የጦር መሣሪያ ድምፅና እየተገነባ ያለው ግዙፍ ወታደራዊ ኃይል እንዳሳሰባቸው በይፋ ተናገሩ። እስራኤል እና ግብፅ የጠበቀ ዲፕሎማሲያዊ ግንኙነት ቢኖራቸውም፣ የግብፅ ጦር አቅም “ከመጠን በላይ ማደግ” በልዩ ጥንቃቄ ሊታይ እንደሚገባው ኔታንያሁ አስገንዝበዋል።
እንደ እስራኤል መገናኛ ብዙኃን ዘገባ ከሆነ፣ ጠቅላይ ሚኒስትሩ ይህንን ጠንከር ያለ መልዕክት ያስተላለፉት በክኔሴት የውጭ ጉዳይ እና የመከላከያ ኮሚቴ ዝግ ስብሰባ ላይ ነው። እስራኤል ከጎረቤቷ ግብፅ ጋር ያላት ግንኙነት ሰላማዊ ቢሆንም፣ በጸጥታው ዘርፍ የሚታዩ ለውጦች ግን ከፍተኛ ጥንቃቄ የሚሹ መሆናቸውን ኔታንያሁ ለኮሚቴው አባላት በዝርዝር አስረድተዋል።
የሚገርመው ግን፣ ይህ ወታደራዊ ስጋት በሁለቱ ሀገራት መካከል ያለውን የቢሊዮን ዶላር የንግድ ትስስር አላገደውም። ባለፈው ታህሳስ ወር ሁለቱ ሀገራት በታሪክ ታይቶ የማይታወቅ የ35 ቢሊዮን ዶላር የጋዝ ስምምነት ተፈራርመዋል። ኔታንያሁ ራሳቸው ይህንን ስምምነት “በእስራኤል ታሪክ ውስጥ ትልቁ የጋዝ ስምምነት” በማለት አወድሰውታል።
እስራኤል እና ግብፅ ከ1979ዱ የካምፕ ዴቪድ ስምምነት በኋላ በይፋ በሰላም ላይ ይገኛሉ። ይህ ታሪካዊ ስምምነት ለበርካታ አስርት ዓመታት የዘለቀውን ጦርነት ያስቆመ፣ እስራኤል ከሲናይ ምድር እንድትወጣ ያደረገ እና በድንበር አካባቢ ከጦርነት ነፃ የሆነ ቀጠና የፈጠረ ነበር። አሁን ግን ይህ የቆየ ሰላም በግብፅ ወታደራዊ ግዝፈት ሳቢያ አዲስ ጥያቄ ውስጥ የገባ ይመስላል።