በኢትዮጵያ አየር መንገድ ማክስ አውሮፕላን አደጋ የቤተሰብ አባላቱን ያጣው ካናዳዊ ዜጋ፣ ከዓመታት የሕግ ትግል በኋላ ከቦይንግ ኩባንያ ጋር በስምምነት ላይ መድረሱ ተሰማ።

በቺካጎ ፌደራል ፍርድ ቤት የሁለቱ ወገኖች የመክፈቻ ክርክር ረቡዕ ዕለት እንዲሰማ ቀጠሮ ተይዞ የነበረ ቢሆንም፣ የከሳሹ ጠበቃ ክሊፎርድ ሎው ኦፊስስ እንደገለጸው ቦይንግ ጉዳዩ ወደ ፍርድ ቤት እንዳያመራ የመጨረሻ ሰዓት የክፍያ ስምምነት አቅርቦ ከከሳሹ ጋር ተስማምቷል።

​ይህ የፍትሐ ብሔር ክስ የቀረበው በመጋቢት 2011 ዓ.ም በአጠቃላይ የ157 ሰዎችን ሕይወት ለቀጠፈው አደጋ ተጠያቂነትን ለማረጋገጥ ሲሆን፣ ከሳሹ ማናንት ቫይዲያ በዚህ አደጋ ወላጆቹን፣ እህቱን፣ አማቹንና ሁለት የእህቱን ልጆች በአንድ ላይ አጥቷል።

የሟቾች ሌሎች ዘመዶች ቀደም ሲል ቦይንግን ለብቻቸው ከሰው በሐምሌ 2016 ዓ.ም ከፍርድ ቤት ውጭ በስምምነት መቋጨታቸው ይታወሳል።

ምንም እንኳን በዚህ በቅርቡ በተደረገው “የመጨረሻ ሰዓት” ስምምነት ውስጥ የተካተተው የገንዘብ መጠን ይፋ ባይደረግም፣ ስምምነቱ ለተጎጂው ቤተሰብ ፍትሕን የሚያረጋግጥ መሆኑን የሕግ ባለሙያዎቹ ገልጸዋል።

​የከሳሹ ጠበቃ ሮበርት ክሊፎርድ እንደገለጹት፣ ቦይንግ መከላከል ለሚቻልና ትርጉም ለሌለው የንጹሐን ዜጎች ሞት ሙሉ ኃላፊነቱን ወስዷል። የኮርፖሬት ግዙፉ አካል አሁን ውድ ወላጆቹንና እህቱን ላጣው ለዚህ ግለሰብ ተጠያቂ መሆኑ ትልቅ የሕግ ድል ተደርጎ ተወስዷል።

ቦይንግ ከዚህ ቀደም በኢትዮጵያና በኢንዶኔዥያ ለደረሱት አደጋዎች ይቅርታ መጠየቁ የሚታወስ ሲሆን፣ ለሁለቱም አደጋዎች መንስኤ የሆነው “ኤም.ሲ.ኤ.ኤስ” (MCAS) የተሰኘው የበረራ ማረጋጊያ ሶፍትዌር መሆኑ ታውቋል።

​ይህ በስምምነት የተቋጨው ክስ በቦይንግ ላይ ሲካሄዱ ከቆዩ የሕግ ሂደቶች አንዱ ሲሆን፣ ባለፈው ኅዳር ወር በተመሳሳይ የቺካጎ ፍርድ ቤት ለአንድ ሕንዳዊ ተጎጂ ቤተሰብ 28.45 ሚሊዮን ዶላር የካሳ ክፍያ እንዲፈጸም መወሰኑን የኤ.ኤፍ.ፒ ዘገባ ያመላክታል።