ኢትዮጵያውያን ስደተኞች በጦርነት እና በመጠለያ እጥረት መካከል

በሊባኖስ በሄዝቦላ እና በእስራኤል መካከል እየተካሄደ ያለው ጦርነት መባባሱን ተከትሎ፣ በሀገሪቱ የሚኖሩ ኢትዮጵያውያን ስደተኞች ለከፋ ሰብአዊ ቀውስና ለመጠለያ እጥረት መጋለጣቸውን ዶይቸ ቬለ ዘግቧል።

የእስራኤል የአየር ድብደባ የቤይሩትን ደቡባዊ ክፍሎች ማዳረስ መጀመሩ በመቶ ሺዎች የሚቆጠሩ ሰዎችን ከቀያቸው ሲያፈናቅል፣ ኢትዮጵያውያን ስደተኞች ግን ካለ መጠለያና ረዳት በየመንገዱ ላይ ለመውደቅ ተገደዋል።

የመንግስት መጠለያ ጣቢያዎች ለሊባኖስ ዜጎች ቅድሚያ በመስጠታቸው ምክንያት፣ ስደተኞቹ ወደነዚህ መጠለያዎች እንዳይገቡ ተከልክለው ለከፍተኛ ስቃይና ለአደጋ ተጋልጠዋል።

ይህ አድልዎ የተቀላቀለበት አሰራር በጦርነት ቀጠና ውስጥ የሚገኙ ወገኖቻችንን ህይወት አሳሳቢ ደረጃ ላይ የጣለው ሲሆን፣ ያለ ምግብና ጥበቃ በየአደባባዩ እንዲያድሩ አድርጓቸዋል።

በአሁኑ ወቅት ግጭቱ አድማሱን እያሰፋ መምጣቱና የደህንነት ስጋቱ መገናኛ መንገዶችን ማዘጋቱ፣ ስደተኞቹ ወደ አስተማማኝ ስፍራዎች ለመንቀሳቀስ ያላቸውን እድል አጥብቦታል።