የመጀመሪያው ድምፅ፡ የአዲስ ትውልድ አገራዊ አሻራ እና የዴሞክራሲያዊ ሽግግር ተስፋ

ግዮን መጽሔት :- በአንድ ወጣት ሕይወት ውስጥ ወደ አዋቂነት የሚደረገው ሽግግር በተለያዩ ማኅበራዊና ሕጋዊ ኩነቶች ይገለጻል። ይሁን እንጂ ከእነዚህ ሁሉ እጅግ የላቀ ትርጉም ያለውና የአንድን ዜጋ የፖለቲካዊ ሕይወት ልደት የሚያበስረው የመጀመሪያው የምርጫ ድምፅ ነው።

ለመጀመሪያ ጊዜ ድምፅ ለመስጠት መዘጋጀት መብት ብቻ ሳይሆን፣ ከአዲሱ ትውልድ ጋር አብሮ የሚመጣ ታሪካዊ ኃላፊነት ነው።

በኢትዮጵያ በቅርቡ በሚካሄደው 7ኛው አገራዊ እና ክልላዊ ምርጫ፣ በሚሊዮን የሚቆጠሩ ወጣቶች ለመጀመሪያ ጊዜ ድምፅ ለመስጠት የምርጫ ካርድ ወስደዋል። ይህ አዲስ ኃይል በአገሪቱ የፖለቲካ ምኅዳር ላይ ምን ዓይነት ለውጥ ሊያመጣ ይችላል?

የመጀመሪያ ጊዜ መራጮች ድምፅ መስጠት ለምን አስፈለገ? ይህ ዕድል በቸልታ ሊታይ የማይገባው ለምንድን ነው? ዩዝ ኤንድ ከልቸራል ዴቨሎፕመንት ፋውንዴሽን (YCDF) እነዚህን ወሳኝ ነጥቦች መሠረት በማድረግ የሚከተለውን ትንታኔ ያቀርባል።

1. የመጀመሪያ ጊዜ መራጮች ስልታዊ አስፈላጊነት

በኢትዮጵያ የስነ-ሕዝብ (Demographics) ሁኔታ ውስጥ ወጣቱ አብዛኛውን ድርሻ ይይዛል። ለመጀመሪያ ጊዜ ድምፅ የሚሰጡ ዜጎች ቁጥር ከፍተኛ መሆን የምርጫውን ውጤት ብቻ ሳይሆን፣ የአገሪቱን የወደፊት የፖለቲካ አቅጣጫ የመቀየር አቅም አለው።

ሀ. የአዳዲስ ሐሳቦች ምንጭ፦

የመጀመሪያ ጊዜ መራጮች ብዙውን ጊዜ  አዲስና ተራማጅ አስተሳሰብ ይዘው የሚመጡ ናቸው። ይህ ትውልድ ለዘመናዊነት፣ ለቴክኖሎጂ፣ ለሥራ ዕድል ፈጠራ እና ለዓለም አቀፋዊ ትስስር የሚሰጠው ዋጋ ከፍተኛ በመሆኑ፣ ፖለቲከኞች አጀንዳቸውን ከነባር ንግግሮች አውጥተው ወደ ዘመናዊና መፍትሔ ተኮር ሐሳቦች እንዲያዞሩ ያስገድዳቸዋል።

ለ. የዴሞክራሲያዊ ተሳታፊነት መሠረት፦

ጥናቶች እንደሚያመለክቱት አንድ ዜጋ በመጀመሪያው ምርጫ ላይ ንቁ ተሳትፎ ካደረገ፣ በቀሪው የሕይወት ዘመኑ በዴሞክራሲያዊ ሂደቶች ውስጥ የመሳተፍ ዕድሉ እጅግ ከፍተኛ ነው።

በመሆኑም የመጀመሪያ ጊዜ መራጮች ዛሬ የሚያደርጉት ተሳትፎ ለአገሪቱ ዘላቂ የዴሞክራሲ ባህል ግንባታ የመሠረት ድንጋይ ነው።

ሐ. የፖለቲካ ፓርቲዎችን ተጠያቂነት ማሳደግ፦

አዳዲስ መራጮች በበዙ መጠን የፖለቲካ ፓርቲዎች ወጣቱን ለማማለልና የልቡን ትርታ ለማዳመጥ ይገደዳሉ። ይህ ደግሞ ወጣቱ በአገራዊ ውሳኔዎች ላይ ያለው ተሰሚነት እንዲጨምር ያደርጋል።

2. የእርስዎ አንድ ድምጽ ለምን አስፈላጊ ናት ተባለ?

የጋራ ኃይል ድምር ውጤት፦

ዴሞክራሲ የቁጥር ጨዋታ ነው። የእርስዎ አንዲት ድምፅ ብቻዋን ላይታይ ትችላለች፤ ነገር ግን የእርስዎ መሰል በሚሊዮን የሚቆጠሩ ወጣቶች ድምፅ ሲደመር አገርን የመምራት ሥልጣን ያለው አካል ይለያል። ድምፅ አለመስጠት ማለት የራስን መብት ለሌሎች አሳልፎ መስጠት እና የሌላውን ምርጫ በዝምታ መቀበል ማለት ነው።

ለወጣቶች ጉዳይ ትኩረት ማስገኘት፦

ፖለቲከኞች ድምፅ በሚሰጣቸው የኅብረተሰብ ክፍል ላይ ያተኩራሉ። ወጣቶች በብዛት ድምፅ የማይሰጡ ከሆነ፣ ፖለቲከኞች የወጣቱን ፍላጎት (እንደ ሥራ ዕድል፣ የትምህርት ጥራትና መሠረተ ልማት) ችላ ሊሉ ይችላሉ።

ድምፅ መስጠት ማለት “እኛ እዚህ አለን፤ ፍላጎታችንንም ማክበር አለባችሁ” የሚል መልዕክት ለባለሥልጣናት ማስተላለፍ ነው።

የሰላም ግንባታ መሣሪያ፦

በኢትዮጵያ ነባራዊ ሁኔታ፣ ሐሳብን በድምፅ መግለጽ ከኃይል አማራጮች የሚገላግል ታላቅ መሣሪያ ነው። ለመጀመሪያ ጊዜ መራጮች በምርጫ ሳጥን በኩል ያላቸውን ፍላጎት ሲገልጹ፣ ለአገሪቱ ሰላማዊ የሥልጣን ሽግግርና ለዴሞክራሲያዊ ዕድገት ትልቅ አስተዋጽኦ እያበረከቱ ነው።

ይህ ጽሑፍ የተዘጋጀው በወጣቶች እና ባህል ልማት ፋውንዴሽን (Youth and Cultural Development Foundation – YCDF) ከ UNDP ጋር በመተባበር ነው።

የወጣቶች እና ባህል ልማት ፋውንዴሽን በኢትዮጵያ ውስጥ የወጣቶችን ሁለንተናዊ አቅም በመገንባት፣ ባህላዊ እሴቶችን በማሳደግ፣ የሰላም ግንባታ ሥራዎችን በማስፋፋት እና የወጣቶችን ንቁ ዴሞክራሲያዊ ተሳትፎ በማጎልበት ላይ በትኩረት
የሚሠራ ገለልተኛ የሲቪል ማኅበረሰብ ድርጅት ነው።

ድርጅቱ ወጣቶች በሀገር ግንባታ ሒደት ውስጥ ገንቢ ሚና እንዲጫወቱ ግንዛቤ በመፍጠርና አቅማቸውን በማጎልበት የላቀ አስተዋጽዖ በማድረግ ላይ ይገኛል።

ግዮን መጽሔት ቅጽ 8 ቁጥር 234  ግንቦት 2018 ዓ.ም