የንግድ ሥርዓቱን ይቀይራል የተባለው አዲሱ የጉምሩክ የልህቀት ማዕከል በይፋ ተመረቀ

የኢትዮጵያ ጉምሩክ ኮሚሽን እና የአዲስ አበባ ዩኒቨርሲቲ የንግድ ሥራ ትምህርት ቤት ስትራቴጂካዊ አጋርነታቸውን በማጠናከር፣ የጉምሩክ የልህቀት ማዕከልን በጋራ ከፍተዋል።

ይህ ማዕከል የጉምሩክ ኢንዱስትሪውን ለማዘመንና የዘርፉን ባለሙያዎች በዓለም አቀፍ ደረጃ ተወዳዳሪ በሚያደርግ ዕውቀት ለማሰልጠን የታለመ ነው።

በመክፈቻ ሥነ-ሥርዓቱ ላይ የኮሚሽኑ ኮሚሽነር አቶ ደበሌ ቃበታ እና የዩኒቨርሲቲው ፕሬዝዳንት ዶ/ር ሳሙኤል ክፍሌን ጨምሮ ከፍተኛ አመራሮች ተገኝተዋል።

ማዕከሉ የሚሰጠው ስልጠና የንግድ ተቋማት ተለዋዋጭ በሆነው የዓለም የንግድ ሥርዓት ውስጥ ዝግጁ እንዲሆኑ ከማድረጉም ባለፈ፣ ኢትዮጵያን ለንግድና ለኢንቨስትመንት ይበልጥ ምቹ የሆነች አገር ለማድረግ ትልቅ አቅም እንደሚፈጥር ተነግሯል።

ባለሙያዎችን በዘመናዊ ቴክኖሎጂ እና አሠራር በማብቃት በጉምሩክ ዘርፍ የሚታዩ የአሠራር ክፍተቶችን ለመሙላት ከፍተኛ አስተዋጽኦ ይኖረዋል።

የአዲስ አበባ ዩኒቨርሲቲ የማዕከሉን ቀጣይነትና ስኬት ለማረጋገጥ ከጉምሩክ ኮሚሽን ጋር በቅርበት ለመሥራት ቃል ገብቷል። ይህ ትብብር በአካዳሚክ ተቋማት እና በመንግሥት መሥሪያ ቤቶች መካከል የሚደረግ የዕውቀት ሽግግር ተምሳሌት ተደርጎ የተወሰደ ሲሆን፣ የሀገሪቱን የንግድ ፍሰት በቴክኖሎጂ የተደገፈ እና ቀልጣፋ ለማድረግ ትልቅ ተስፋ የተጣለበት እርምጃ ነው።