ስታንቢክ ባንክ በኢትዮጵያ አዲስ ባንክ ለመክፈት እያጠና መሆኑን አስታወቀ

በደቡብ አፍሪካው ስታንዳርድ ባንክ ግሩፕ ስር የሚንቀሳቀሰው ስታንቢክ ባንክ ፣ በኢትዮጵያ የፋይናንስ ዘርፍ ውስጥ በሀገር በቀል ባንኮች ላይ ድርሻ ከመግዛት ይልቅ፣ ሙሉ በሙሉ በራሱ ባለቤትነት የሚተዳደር አዲስ የባንክ ተቋም ከዜሮ ለመመስረት አማራጮችን እያጠና መሆኑን አስታወቀ።

​ይህ ውሳኔ የተሰማው በኢትዮጵያ ብሔራዊ ባንክ የወጡ የውጭ ዜጎች የባለቤትነት ገደብ መመሪያዎች፣ ዓለም አቀፍ አበዳሪዎች በግዢ ላይ የተመሰረቱ የተለመዱ የማስፋፊያ ስልቶቻቸውን እንዲከልሱ እያስገደዳቸው ባለበት ወቅት ነው።

​በኢትዮጵያ በቅርቡ በፀደቀው የባንክ ሥራ አዋጅ መሠረት፣ የውጭ ኢንቨስተሮች ነባር የአገር ውስጥ ባንኮችን ድርሻ በመግዛት መግባት የሚችሉት እስከ 49 በመቶ ብቻ ሲሆን፣ ቀሪው 51 በመቶ በአገር ውስጥ ባለሀብቶች መያዝ አለበት።

ይህ ሕግ እንደ ኬሲቢ፣ ኤክዊቲ ግሩፕ እና ኮኦፕሬቲቭ ባንክ ያሉ ትልልቅ የኬንያ ባንኮች በኢትዮጵያ የነበራቸውን የማስፋፊያ ዕቅድ የውሳኔ ሰጪነት ሚናቸውን ስለሚገድበው እንዲዘገይ አድርጎታል።

​የስታንቢክ ባንክ የምስራቅ አፍሪካ ቀጣናዊ ዋና ሥራ አስፈጻሚ ጆሹዋ ኦይጋራ በጆሃንስበርግ በሰጡት መግለጫ፣ ባንካቸው አነስተኛ ድርሻ ይዞ መግባት እንደሚያስቸግረው ገልጸው፣ አዲስ ባንክ ከባዶ የመመስረት አማራጭ ግን የ49 በመቶ ገደቡ ስለማይመለከተው ሙሉ በሙሉ ባለቤት ለመሆን የተሻለ መንገድ እንደሆነ ጠቁመዋል።

​ባንኩ የሳፋሪኮም ኢትዮጵያን ተሞክሮ እንደ ማሳያ በመጥቀስ፣ መጀመሪያ ላይ ከፍተኛ የመሠረተ ልማት ወጪዎችን ቢጠይቅም፣ የረጅም ጊዜ እይታ ላላቸው ባለሀብቶች የኢትዮጵያ ገበያ አዋጭ መሆኑን ገልጿል።

ስታንዳርድ ባንክ ከ2015 ጀምሮ በኢትዮጵያ ተወካይ ጽሕፈት ቤት የነበረው ሲሆን፣ አሁን የታሰበው አዲስ ባንክ የመመስረት ዕቅድ ይህንን መሠረት ይበልጥ የሚያጠናክር ይሆናል።

ይሁን እንጂ ባንኩ ሥራ ለመጀመር ስላሰበበት የተወሰነ የጊዜ ሰሌዳም ሆነ ስለሚያስፈልገው የካፒታል መጠን እስካሁን በይፋ የገለጸው ነገር የለም።