በ7ኛው ጠቅላላ ምርጫ በተለያዩ ክልሎች በምርጫ አስፈጻሚነት የተሰማሩ ዜጎች የሰሩበት ከግማሽ በመቶ በላይ ክፍያ እንዳልተፈጸመላቸው፣ በተፈጸመው ክፍያም ቢሆን የሰሩበት ቀን የተቀነሰባቸው እንዳሉና ምርጫ ቦርድ መፍትሄ እንዳልሰጣቸው ገለጹ።
“ በውላችን መሰረት ያልተከፈለው 60% ቀሪ ክፍያና የአራት ቀናት የቅድመ ስምሪት ወጪ እስከዛሬ ድረስ አተፈጸመም ” ብለዋል።
” በተደጋጋሚ የተሰጡ ቀጠሮዎች ሳይፈጸሙ ቀርተዋል ” በማለትም ወቅሰዋል።
በምርጫው ” በታማኝነት፣ በትጋትና በሙሉ ኃላፊነት የሰራን የምርጫ አስፈጻሚዎች ነን። ሀገራዊ ግዴታችንን በአግባቡ ተወጥተናል፤ ግን የሚገባንን ክፍያ እስካሁን አላገኘንም ” ሲሉ ገልጸዋል።
” ‘ከሐምሌ 11 እስከ 15/2018 ክፍያው ይፈጸማል'” ተብሎ እንደተገለጸላቸው አስታውሰው፣ ሆኖም ” ሐምሌ 18/2018 ቢያልፍም ምንም ክፍያ አልተፈጸመም። ይህ ሁኔታ በምርጫ ቦርዱ ላይ ያለንን እምነት እየሸረሸረ ይገኛል ” ብለዋል።
በአማራ ክልል በተለይ ሰሜን ወሎ ዞን የሚገኙ ምርጫ አስፈጻሚዎች ደግሞ፣ እስከ ሰኔ 2018 ዓ/ም ሙሉ ክፍያ ይፈጸማል ቢባሉም አለመፈጸሙን፣ 40% ክፍያ ሲፈጸምላቸውም ቢሆን የሰሩባቸው ቀናት መቀነሳቸውን ተናግረዋል።
አንድ የምርጫ አስፈጻሚዎች አስተባባሪ በሰጡን ቃል፣ ” እኛ ጋ የመጣው የጣቢያ አስፈጻሚዎች ክፍያ የ54 ቀናት መሆን እያለበት የ39 ቀናት ነው። በየወረዳው ላሉ ሦስት፣ ሦስት የምርጫ ክልል አስፈጻሚዎች ክፍያ ደግሞ መሆን የነበረበት የ169 ቀናት ነው፤ ግን የ79 ቀናት አልታሰበም ” በማለት ተናግረዋል።
40 በመቶ ክፍያ ሲፈጸምላቸው የ39 እና የ90 ቀናት ብቻ መሆኑን፣ 60 በመቶ የሚሆነው ክፍያ ደግሞ ጭራሽ እንዳልተፈጸመ ገልጸው፣ ” የኛ ብቻ ቀኑ የሚቀነስበት ምክንያት ምንድን ነው? ” ሲሉ ጠይቀዋል።
በተለያዩ አካባቢዎች ያሉ ቅሬታ አቅራቢዎች፣ ክፍያቸው መዘግየቱና ሙሉ በሙሉ አለመከፈሉ ቤተሰቦቻቸው ጭምር ኢኮኖሚያዊ ጫና መፍጠሩን በመጥቀስ፣ የሚመለከታቸው አካላት ውዝፍ ክፍያውን በአስቸኳይ እንዲፈጽሙና ለአስፈጻሚዎች ግልጽና ፈጣን ምላሽ እንዲሰጡ በጽኑ አሳስበዋል።
ቅሬታቸውን ይዞ ከምርጫ ቦርድ ምላሽ ለማግኘት ያደረገው ተደጋጋሚ ሙከራ ስልክ ባለመነሳቱ ያልተሳካ ሲሆን፣ ሙከራው ይቀጥላል።
@tikvahethiopia