ኢትዮጵያና እስራኤል በቀይ ባሕርና በቀጣናዊ የጸጥታ ጉዳዮች ላይ በጋራ ለመሥራት ተስማሙ

በመካከለኛው ምስራቅና በአፍሪካ ቀንድ፣ በተለይም በቀይ ባሕር አካባቢ እየታየ ያለው የጂኦ-ፖለቲካዊ ውጥረት በበረታበት በዚህ ወቅት፣ የኢትዮጵያና የእስራኤል መንግሥታት ስትራቴጂካዊ ግንኙነታቸውን ይበልጥ ለማጥበቅ ተስማምተዋል።

የውጭ ጉዳይ ሚኒስትር ዴኤታ አምባሳደር ሃደራ አበራ ከእስራኤል የውጭ ጉዳይ ሚኒስትር ጌዲዮን ሳዓር ጋር በኢየሩሳሌም ባደረጉት ውይይት፣ ሁለቱ ሀገራት በቀጣናዊ ሰላምና ደኅንነት ዙሪያ ያላቸውን ትብብር ወደ ላቀ ደረጃ ለማሸጋገር መወሰናቸውን ገልጸዋል።

ይህ የከፍተኛ ባለሥልጣናት ምክክር በዋናነት በቀይ ባሕር ወሳኝ የባሕር መስመር ላይ እያጋጠሙ ያሉ የጸጥታ ስጋቶችን በጋራ ለመመከትና የሽብርተኝነት እንቅስቃሴዎችን ለመግታት በሚያስችሉ ጉዳዮች ላይ ያተኮረ ነው።

በቅርቡ በኢየሩሳሌም ለሚካሄደው 4ኛው የኢትዮ-እስራኤል የፖለቲካ ምክክር መድረክ እንደ መነሻ የታየው ይህ ውይይት፣ ሁለቱ ወገኖች በቀጣናው ሰላምና መረጋጋትን ለማስፈን መረጃ በመለዋወጥና በቅንጅት መሥራት ለሁለቱም ሀገራት ብሔራዊ ጥቅም ወሳኝ መሆኑን ገልፀዋል።

ከጸጥታው ዘርፍ ጎን ለጎን፣ በሁለቱ ሀገራት መካከል ያለውን የኢኮኖሚ ትብብር ይበልጥ ለማሳደግና ጥልቅ ለማድረግ ሰፊ ፍላጎት መኖሩ ተገልጿል።