“ግሪንላንድ በአሜሪካ ቁጥጥር ስር መዋል አለባት”

በአንካራ እየተካሄደ ባለው የሰሜን አትላንቲክ ጦር ቃል ኪዳን ድርጅት (NATO) ጉባኤ ማግስት፣ የአሜሪካው ፕሬዝዳንት ዶናልድ ትራምፕ ለአውሮፓ ሀገራት ታይቶ የማይታወቅ ጠንካራ ማስጠንቀቂያ ሰጥተዋል።

የፋይናንሻል ታይምስ ይፋ ባደረገው መረጃ መሠረት፣ ትራምፕ “ሁሉንም የአሜሪካ ወታደሮች ከአውሮፓ ግዛት ላስወጣ እችላለሁ” ሲሉ ዝተዋል።
 
ፕሬዝዳንት ትራምፕ ከቱርኩ ፕሬዝዳንት ረሲፕ ታይፕ ኤርዶጋን ጋር በነበራቸው የሁለትዮሽ ስብሰባ ላይ እንደተናገሩት፣ በዴንማርክ ሥር የምትገኘውና ስትራቴጂካዊ ጠቀሜታ ያላት የአርክቲክ ደሴት “ግሪንላንድ” በአሜሪካ ቁጥጥር ሥር መዋል አለባት።
 
ትራምፕ አክለውም፦ “ግሪንላንድ በዴንማርክ ሳይሆን በአሜሪካ ቁጥጥር ስር መሆን ይገባታል። ዴንማርክ ለግሪንላንድ የምታወጣው ምንም አይነት በቂ ገንዘብ የለም፤ ነገር ግን ደሴቷ ለአሜሪካ እጅግ አስፈላጊ ክፍል ናት” ሲሉ የአውሮፓ አጋሮቻቸው ይህንን ጥያቄ ባለመቀበላቸው ከኔቶ ጋር ያላቸው ግንኙነት መሻከሩን በግልጽ ተናግረዋል።

ደሴቷ በሩሲያ እና በቻይና መርከቦች እየተከበበች ነው የሚል ስጋታቸውንም በድጋሚ አንስተዋል።
 
ይህን ጥያቄ ተከትሎ አውሮፓውያን አጋሮች ፈቃደኛ ባለመሆናቸው፣ በአውሮፓ አህጉር የሚገኙትንና ለአውሮፓ መከላከያ ዋስትና ተደርገው የሚወሰዱትን 80,000 ገደማ የአሜሪካ ወታደሮች ሙሉ በሙሉ ጠቅልለው እንዲወጡ ሊያደርጉ እንደሚችሉ አስታውቀዋል።
 
ይህ የትራምፕ ይፋዊ መግለጫ ባለፉት ስምንት አስርት ዓመታት ውስጥ በምዕራባውያን መካከል የተገነባውን ወታደራዊ ህብረት (NATO) ክፉኛ እያናጋው ይገኛል።

የአውሮፓ መሪዎች አሜሪካ ከጎናቸው ካልቆመች ራሳቸውን ከሩሲያ ጥቃት እንዴት መከላከል እንደሚችሉ ማሰብ ወደጀመሩበት አስገዳጅ ምዕራፍ ተሸጋግረዋል።
 
ትራምፕን ለማረጋጋት የኔቶ ዋና ጸሐፊ ማርክ ሩተ የአውሮፓ ሀገራት የመከላከያ ወጪያቸውን ወደ 5% (ከጠቅላላ የአገር ውስጥ ምርታቸው) እንዲያሳድጉ ጥሪ አቅርበዋል። ይሁን እንጂ ትራምፕ አውሮፓውያን በአሜሪካ ትከሻ ላይ “በነፃ ለመጓዝ” ይፈልጋሉ የሚለውን ትችት አሁንም እንደቀጠሉበት ነው።
 
በሌላ በኩል ፕሬዝዳንት ትራምፕ በጉባኤው ላይ ከቱርክ ጋር ያላቸውን ወዳጅነት የሚያሳይ እርምጃ ወስደዋል። ቱርክ ከሩሲያ የጸረ-ሚሳኤል መከላከያ ዘዴ በመግዛቷ ምክንያት በአሜሪካ ተጥሎባት የነበረውን ማዕቀብ እንደሚያነሱ እና ወደ ኤፍ-35 (F-35) ዘመናዊ ተዋጊ ጄት ፕሮግራም እንድትመለስ መንገዱን እንደሚያመቻቹ ገልጸዋል።