በዚህም በኢትዮጵያ ፈቃድ ያላቸው የመገናኛ ብዙኃን አጠቃላይ ብዛት 292 እንደደረሱ ሰምተናል፡፡
የመገናኛ ብዙኃኑ የሚመዘገቡበት ዘርፍም ወደ አስር አድጓል ተብሏል፡፡
ከእነዚህ ዘርፎችም፣ የህዝብ፣ የማህበረሰብ፣ የሀይማኖት፣ የንግድ፣ የበይነ መረብ፣ የክፍያ(እንደ ዲኤስ ቲቪ ያሉ) እና የትምህርት የመገናኛ ብዙሃን እንደሚገኙበት ተጠቅሷል፡፡
የኢትዮጵያ መገናኛ ብዙሀን ባለስልጣን አዳዲስ ቴክኖሎጂዎችን ተከትለው እየመጡ ያሉ የመገናኛ ብዙሀን ዘርፎችን ወደ አሰራሬ አስገብቼ ለመመዝገብ እየበረታሁ ነው ብሏል፡፡
በአሁን ሰዓት በሀገሪቱ 236 በስርጭት ላይ እንዲሁም 56 ፍቃድ ወስደው በዝግጅት ላይ ያሉትን ጨምሮ በድምሩ 292 በባለስልጣኑ የተመዘገቡ የመገናኛ ብዙሃን እንደሚገኙ ተነግሯል፡፡
ከእነዚህም ውስጥ 65ቱ በበይነ መረብ በመደበኛነት የሚድያን ስራ ለመስራት የተመዘገቡ ናቸው ተብሏል፡፡
ይህንን ለሸገር ራዲዮ የተናገሩት በኢትዮጵያ መገናኛ ብዙኃን ባለልጣን የመገናኛ ብዙሀን ፈቃድ ምዝገባና እውቅና ዴስክ ሀላፊ ደሴ ከፋለ ናቸው፡፡
በተለይም ዘመኑ የተለያዩ ቴክኖሎጂዎችን እያመጣ ስለሆነም እነዚህን ታክከው የሚመጡ የመገናኛ ብዙኃን ዘርፎችንም በፈቃድ ስርዓት ለማካተት እየሰራን ነው ብለዋል፡፡
ከእነዚህም መካከል፤ ኦቨር ዘ ቶፕ #OTT ወይም በኢንተርኔት አማካኝነት የተጫኑ ይዘቶችን ማንኛውም ሰው በፈለገው ሰዓት ማግኘት የሚችልባቸው፤ እንዲሁም ኢንተራክቲቭ ቮይስ ሪስፖንስ #IVR የሞባይል ኔትዎርክን በመጠቀም በሬድዮ እንደሚሰራጩትንና መሰል ይዘቶችን በአጭር ቁጥር ደውሎ ማድመጥ የሚያስችሉ ዘመንኛ መላዎችን እንደምሳሌነት ተጠቅሰዋል፡፡
ማንያዘዋል ጌታሁን
ሸገር 102.1