ቻይና የዶክትሬት (PhD) ድግሪ አሰጣጥ ላይ አብዮት ፈጠረች!

ቻይና በዶክትሬት (PhD) ትምህርት ዘርፍ ትልቅ ለውጥ በማምጣት፣ እጩ ዶክተሮች ረጅም የጥናት ጽሁፍ (Thesis) ከማቅረብ ይልቅ ተግባራዊ የፈጠራ ውጤቶችን በማልማት ድግሪያቸውን እንዲያገኙ ልትፈቅድ መሆኑ ተሰማ።

ይህ እርምጃ ከፍተኛ የትምህርት ተቋማት ከንድፈ-ሀሳብ ባለፈ ለተግባራዊ ምርምር እና ለዓለም አቀፍ የፈጠራ ውጤቶች ትኩረት እንዲሰጡ ለማድረግ የታለመ ነው።

እንደ ኢንጂነሪንግ እና ቴክኖሎጂ ባሉ የሳይንስ ዘርፎች ተማሪዎች የጥናት ሰነድ ከማዘጋጀት ይልቅ ለገበያ የሚውሉ ቴክኖሎጂዎችን ወይም አዳዲስ የፈጠራ ውጤቶችን (Prototypes) በማሳየት ብቃታቸውን እንዲያረጋግጡ ዕድል ይሰጣቸዋል።

ይህ አዲስ አቅጣጫ በትምህርት እና በኢንዱስትሪ መካከል ያለውን ክፍተት በማጥበብ ለሀገር ኢኮኖሚ ፈጣን እድገት አስተዋጽኦ ያደርጋል ተብሎ ታምኖበታል።

ምንም እንኳን አንዳንድ ምሁራን የንድፈ-ሀሳብ ምርምር መሰረታዊ ሳይንስ እንዳይጎዳ ቢሰጉም፣ አብዛኛው ደጋፊ ግን የከፍተኛ ትምህርት ውጤት በወረቀት ላይ ብቻ ሳይሆን በተጨባጭ ለውጥ ላይ መመስረት አለበት በማለት ድጋፋቸውን እየገለጹ ይገኛሉ።

ይህ አሰራር በስፋት ተግባራዊ ከሆነ ከፍተኛ ትምህርት ለኢኮኖሚ ልማትና ለፈጠራ ግቦች የሚኖረውን ሚና ሙሉ በሙሉ የሚቀይር ይሆናል።