«የምድር ጌጥ ኢትዮጵያ» ታሪካዊ ዐውደ ርዕይ በሆላንድ ፓርክ በድምቀት ተከፈተ

ዐውደ ርዕዩ  ለተከታታይ ሦስት ሳምንታት (ቅዳሜና እሁድ ብቻ) ለሕዝብ ክፍት ሆኖ ይቆያል።

 በኢትዮጵያ በመጥፋት ላይ ያለውን ጥንታዊ የብራና አዘገጃጀት፣ የጽሕፈትና የቅዱሳት ሥዕላት ቅርስ ጥበቃ ጥበብ መልሶ በማነቃቃት የታወቀው ሐመረ ብርሃን የብራና መጻሕፍት ሥራ ተቋም ያዘጋጀው ታላቁ «የምድር ጌጥ ኢትዮጵያ» የልጆችና የቤተሰብ ልዩ ታሪካዊ ዐውደ-ርዕይ ትናንት ቅዳሜ መስከረም 30 ቀን 2019 ዓ.ም. በሆላንድ ፓርክ በድምቀት ዳግም ተከፍቷል።

በመጀመሪያው ዙር እጅግ ከፍተኛ አድናቆትን ያተረፈው ይህ ዐውደ ርዕይ፤ ከሕዝብ፣ ከቤተሰቦችና ከተለያዩ የሰንበት ትምህርት ቤቶች በቀረቡ ተደጋጋሚና ጠንካራ ጥያቄዎች መሠረት ለሁለተኛ ዙር ከጠዋቱ 4:00 ሰዓት ጀምሮ በይፋ ዳግም ለዕይታ መብቃቱን ተቋሙ አስታውቋል።

በዚህ ይፋዊ የመክፈቻ ሥነ-ሥርዓት ላይ ሊቃነ ጳጳሳት፣ታላላቅ አበው ሊቃውንት፣ ታዋቂ ሰዎች፣ የሃይማኖት አባቶችና የተገኙ ሲሆን፣ ሁነቱ የሀገሪቱን ጥንታዊ ሥልጣኔና ማንነት ለቀጣዩ ትውልድ ለማስተላለፍ ያለውን ታላቅ አገራዊ ፋይዳ በተግባር ያሳየ ሆኖ ውሏል። የሃይማኖት አባቶችና ሊቃውንቱ በሰጡት አስተያየት፣ እንዲህ ዓይነቱ መድረክ ሕፃናትና ታዳጊዎች የሀገራቸውንና የቀደምት አባቶቻቸውን ጥንታዊ የታሪክ አሻራ በቅርብ እንዲያውቁና ማንነታቸውን በኩራት እንዲረዱ ለማድረግ ምትክ የሌለው መሆኑን አብራርተዋል።

ትንታኔ፦ ታሪክን ማየት ብቻ ሳይሆን መዳሰስ

የዚህ ዐውደ ርዕይ ልዩ መለያ ባህሪ ታሪክንና ቅርሶችን በጽሑፍ ወይም በምስል ብቻ ሳይሆን፣ ሕፃናትና ታዳጊዎች የኢትዮጵያን ጥንታዊ ሥልጣኔና ማንነት በአካል አይተውና በእጃቸው ዳስሰው ዕውቀት እንዲቀስሙበት ማስቻሉ ነው። ሐመረ ብርሃን ተቋም ከተመሠረተበት 2010 ዓ.ም. ጀምሮ ላለፉት ዓመታት በባህል ቱሪዝም ልማት፣ በቅርስ ግንዛቤና በትውልድ ቅርስ ትምህርት ዙሪያ የኢትዮጵያን ባህላዊ ስ ለዓለምና ለሀገር ውስጥ ማኅበረሰብ በማስተዋወቅ ረገድ ግንባር ቀደም ሚናውን ሲወጣ ቆይቷል። ይህ «የምድር ጌጥ ኢትዮጵያ — ታሪክና ቅርስ በሕያው ዐውደ ርዕይ» የተሰኘው መርሃ ግብርም የዚሁ አኩሪ ጉዞ ማሳያና የትውልድ ግንባታ መሠረት ነው።

የጉብኝት መርሐ ግብርና የቦታ ዝርዝር

ዐውደ ርዕዩ ከትናንት ጀምሮ ለተከታታይ ሦስት ሳምንታት (ቅዳሜና እሁድ ብቻ) ለሕዝብ ክፍት ሆኖ የሚቆይ ሲሆን፣ ዝርዝር ቀናቱም እንደሚከተለው ተደራጅተዋል፦
• ሳምንት 1፦ከትናንት መስከረም 30 እና ጥቅምት 1 ቀን 2019 ዓ.ም.
• ሳምንት 2፦ ጥቅምት 7 እና ጥቅምት 8 ቀን 2019 ዓ.ም.
• ሳምንት 3፦ ጥቅምት 14 እና ጥቅምት 15 ቀን 2019 ዓ.ም.
• ቦታ፦ ሆላንድ ፓርክ (ከጦር ኃይሎች ወደ የሺ ደበሌ በሚወስደው መንገድ፣ ከሆላንድ ኤምባሲ ጀርባ)
ይህ የብራና አዘገጃጀትና የጥንታዊ ቅርሶች ጥበቃን ለሕፃናትና ለቤተሰብ የሚያስተዋውቀው ታላቅ አገራዊ መርሃ-ግብር የሀገርን ባህልና ቱሪዝም ከማሳደግ ባሻገር፣ ትውልዱ በማንነቱ ላይ ጠንካራ እውቀት እንዲኖረው የሚያደርግ በመሆኑ በሁለተኛው ዙርም በላቀ ሁኔታ ስኬታማ እንደሚሆን ሙሉ እምነት ተጥሎበታል።

«ባህልና ቅርስ የሀገርና የትውልድ ጌጥ ናቸው!»