የዓለም የቡና ገበያ ዋጋ በከፍተኛ ሁኔታ መቀነሱ ተገለጠ

በዓለም አቀፍ ደረጃ በቡና አቅርቦት ላይ ተፈጥሮ የነበረው ስጋት እየረገበ በመምጣቱ፣ የቡና ገበያ ዋጋ በከፍተኛ ሁኔታ መቀነሱ ተገለጸ። በተለይም በመካከለኛው ምስራቅ ለንግድ ፍሰቱ እንቅፋት ሆኖ የነበረው የጂኦፖለቲካዊ ውጥረት መላላት ለገበያው መረጋጋት እንደ ዋና ምክንያት ተጠቃሽ ሆኗል።

የኢራን መንግስት ስትራቴጂካዊ ጠቀሜታ ያለውን የሆርሙዝ የባህር ሰርጥ ለንግድ መርከቦች ክፍት ማድረጉን ማስታወቁ፣ የቡና ንግድ ፍሰት ወደ መደበኛ ሁኔታው እንዲመለስ በማድረግ የአቅርቦት ስጋቱን ቀርፎታል።

ለቡና ዋጋ መውረድ ተጨማሪ ምክንያት ሆኖ የተጠቀሰው የብራዚል ከፍተኛ የምርት ትንበያ ነው። ብራዚል በ2026/27 የምርት ዘመን እስከ 75.9 ሚሊዮን ከረጢት የሚደርስ ከፍተኛ ምርት ታመርታለች ተብሎ መጠበቁ እና በ2026 ዓ.ም የዓለም የቡና ትርፍ ምርት ወደ 10 ሚሊዮን ከረጢት ያድጋል የሚለው ትንበያ ለገበያው መረጋጋት አስተዋጽኦ አድርጓል።

የአረቢካ እና ሮቡስታ ቡና ዋጋዎች በቅደም ተከተል የ2.28% እና 2.50% ቅናሽ ያሳዩ ሲሆን፣ ይህም አረቢካ ቡና በሳምንት ውስጥ ዝቅተኛው ዋጋ ላይ እንዲደርስ አድርጎታል።

በሌላ በኩል ቪየትናም የቡና ወጪ ንግዷን በ14% ማሳደጓ ለሮቡስታ ቡና ዋጋ መውረድ የራሱ ድርሻ ቢኖረውም፣ በብራዚል የታየው አነስተኛ የዝናብ መጠን እና የክምችት መመናመን ግን ዋጋው መልሶ እንዲያገግም ተቃራኒ ግፊት እያደረጉ ይገኛሉ።

ባጠቃላይ የዓለም የቡና ምርት በ2025/26 የምርት ዘመን በ2% አድጎ 178.8 ሚሊዮን ከረጢት ይደርሳል ተብሎ ቢገመትም፣ የገበያው መዋዠቅ አሁንም እንደቀጠለ መሆኑን የዘርፉ ተንታኞች ገልጸዋል።