የገንዘብ ሚኒስቴር አዲስ የገቢ ግብር ረቂቅ ደንብ ማዘጋጀቱን አስታወቀ

አዲሱ መመሪያ የገቢ ግብር አዋጅ ቁጥር 1395/2017ን ለማስፈጸም ያለመ ሲሆን፣ በኢትዮጵያ ነዋሪ ሆነው ከሀገር ውስጥም ሆነ ከውጭ ምንጮች በዲጂታል አማራጮች ገቢ የሚያገኙ ግለሰቦችን በሙሉ የሚመለከት ነው።

ረቂቅ ደንቡ በተለይ የዲጂታል ይዘት ፈጣሪዎች በጥሬ ገንዘብም ሆነ በዓይነት የሚያገኙትን ገቢ በትክክል የሚገልጽ የሂሳብ መዝገብ የመያዝ ግዴታ እንደሚኖርባቸው ይደነግጋል።

ከዚህም በተጨማሪ ለፈጣሪዎቹ ክፍያ የሚያመቻቹ ኩባንያዎች ስለ ተከፋዮቹ ማንነትና የክፍያ መጠን በየሩብ ዓመቱ ለታክስ ባለሥልጣኑ ሪፖርት እንዲያደርጉ ይጠበቅባቸዋል።

ሚኒስቴሩ ማንኛውም ፍላጎት ያለው አካል በረቂቁ ላይ ያለውን አስተያየት እስከ መጋቢት 1 ቀን 2018 ዓ.ም ድረስ በጽሑፍ ወይም በኢሜል እንዲያቀርብ ጥሪ አቅርቧል።

ይህ እርምጃ በሀገሪቱ እያደገ የመጣውን የዲጂታል ኢኮኖሚ ከነባሩ የግብር ሥርዓት ጋር ለማስተሳሰር የተወሰደ ትልቅ እርምጃ እንደሆነ ተገልጿል።