ከሱዳን የተፈናቀሉ ከ7 ሺሕ በላይ ኢትዮጵያውያን ሰሜን ወሎ መግባታቸው ተገለጸ

ከ7 ሺሕ በላይ ኢትዮጵያውያን ከሱዳን ተፈናቅለው አማራ ክልል ሰሜን ወሎ ዞን መግባታቸውን የዞኑ አደጋ መከላከልና ምግብ ዋስትና ጽህፈት ቤት አስታውቋል።

የጽሕፈት ቤቱ ኃላፊ ዓለሙ ይመር፤ ከቅርብ ዜያት ወዲህ ከሱዳን ድንበር ተፈናቅለው ሀርቡ ወረዳ በሚገኝ መጠለያ ጣቢያ የሚገኙት ፍልሰተኞች ቁጥር ከጊዜ ወደ ጊዜ እንዳሻቀበ የገለጹ ሲሆን፤ 945 አባወራዎች ወይም ከ7 ሺሕ በላይ ሰዎች መሆናቸውን አሐዱ ተናግረዋል።

አክለውም፤ “ከሀገር ውስጥም ሆነ ከጎረቤት ሀገራት ተፈናቅለው ወደ ዞኑ የሚገቡ ተፈናቃዮች ሀርቡ ወረዳ በሚገኝ መጠለያ ጣቢያ ይገኛሉ” ብለዋል፡፡

“የተፈናቃዮች ቁጥር ከአቅማችን በላይ ሆኗል” ያሉት ኃላፊው፤ የመጠለያ ጣቢያ ካምፖቹ ሲመሰረቱ ለ6 ወር ብቻ እንዲያገለግሉ ቢሆንም አሁን 7 ዓመት እየሆናቸው እንደሚገኝ አስረድተዋል፡፡

ከታሰበው በላይ ረዥም ዓመት ያገለገሉት ካምፖችም በእርጅና ምክንያት ከጥቅም ውጪ እየሆኑ እንደሚገኙም አንስተዋል፡፡

“መጪው ክረምት እንደመሆኑ የችግሩን አሳሳቢነት ከግንዛቤ ውስጥ በማስገባት ለሚመለከታቸው አካላት ከክልል እስከ ፌደራል ባለው የአደጋ መከላከል እና ምግብ ዋስትና ጥያቄ ብናቀርብም ምላሽ እያገኘን አይደለም” ብለዋል።