በመርጦ ለማርያም የአስተርዮ ማርያም  የንግስ በዓል በደማቅ ሁኔታ ይከበራል

‎የጥር አስተርዮ በዓል  ኃይማኖታዊ ይዘቱንና ትውፊቱን በጠበቀ መልኩ በደመቀ ሁኔታ ለማክበር አስፈላጊውን የቅድመ ዝግጅት ስራዎችን ማጠናቀቅ መቻሉን የእነብሴ ሳር ምድር ወረዳ የኮሙኒኬሽን ጉዳዮች ጽ/ቤት ባለሙያ የሆኑት አንለይ ደረሰ  ለብስራት ሬዲዮ ተናግረዋል፡፡

ለበዓሉ ድምቀትና ውበት ከጽዳት ዘመቻ ጀምሮ እስከ ማስዋብ ስራዎችን በዘመቻ እየሰሩ እና እንግዶችን ለመቀበል የቅድመ ዝግጅት ስራዎች መሰራታቸው ተገልጿል ።

መርጦለማርያም በኢትዮጵያ ካሉ ገዳማት መካከል  ቀዳሚ ከሚባሉት መካከል መሆኗን እና በርካታ ተንቀሳቃሽ እና ቋሚ ቅርሶች ባለቤት መሆኗ ተገልጿል ።

ከባለፈው አመት ጀምሮ በአካባቢው ባለው የጸጥታ ችግር ምክንያት በሚፈለገው መጠን እንግዶች እየገቡ አለመሆኑ እና  ከዚህ በፊት እስከ ሃያ ሺህ እንግዶች ይገኙ የነበረ መሆኑ  ተነግሯል።

‎በዓሉ በየዓመቱ ከተለያዩ አካባቢ በሚመጡ ሊቀጳጳሳት እና አባቶች ተባርኮ በደማቅ ሁኔታ የሚከበር በመሆኑ ሁሉም ምእመናን በበዓሉ ቀን በቦታው በመገኘት የበረከቱ ተሳታፊ እንዲሆኑ የኮሙኒኬሽን ጉዳዮች ጽ/ቤት ባለሙያ የሆኑት አንለይ ደረሰ ጥሪያቸውን አስተላልፈዋል።