የባንኮች የብድር እጥረት በቁጠባና ብድር ላይ የፋይናንስ አደጋን አስከትሏል

ባንኮች ሳኮሶችን በመጠቀም የብድር አገልግሎት ቢያቀርቡ ለብዙ ዜጎች ተደራሽ መሆን እንደሚችል ቢታመንም፣ ያለው የብድር አቅርቦት መጣበብ የታሰበው ዕቅድ ከግብ እንዳይደርስ እንቅፋት መሆኑ ተጠቁሟል።

ካፒታል የተሰኘው የገንዘብ ቁጠባና ብድር ኅብረት ሥራ ማኅበር በሰጠው ማብራሪያ፣ በኬንያ ከጠቅላላ የሀገር ውስጥ ምርት (GDP) 45 በመቶ የሚሸፍኑት ሳኮሶች እንደሆኑና 35 በመቶ የሚሆኑ ቤቶችም በነዚህ ተቋማት እንደሚቀርቡ አመልክቷል።

በተጨማሪም የትራንስፖርት ተቋማት በተለያዩ መልኩ የኅብረቱ አባላት እንደሆኑ የገለጸው ማኅበሩ፣ ኢትዮጵያ ግን ወደዚህ ሥርዓት ገና እንዳልገባች ተናግሯል።

ይህ በእንዲህ እንዳለ፣ ካፒታል የገንዘብ ቁጠባና ብድር ኅብረት ሥራ ማኅበር ከተመሠረተ በአንድ ዓመት ጊዜ ውስጥ ከነበሩት 764 አባላቱ መካከል ለግል ሥራቸው የሚሆን ብድር ለጠየቁ 152 አባላት ከ249 ሚሊዮን ብር በላይ መደበኛና ወለድ አልባ ብድር ማቅረቡን አስታውቋል።

በተለይም የኅብረተሰቡን አሠራር አሟልተው ለተገኙ 86 አባላት ለመኪና ግዢ የሚሆን ብድር በቅርቡ መሰጠቱ ተገልጿል።

ይሁን እንጂ፣ በባንኮች ያለው የብድር እጥረት ሳኮሶች በስፋት ብድር በማቅረብ ረገድ ውስንነት እንዲኖርባቸው ማድረጉ ተጠቁሟል። በተለይም አነስተኛ የፋይናንስ አገልግሎት ተደራሽነት ባለባቸው የገጠር አካባቢዎች ከ21,000 በላይ ሳኮሶች ቢኖሩም፣ ተወዳዳሪ የፋይናንስ ተቋማት ለመሆን የሚያስችላቸው የመጠንና የክህሎት ውስንነት እንደሚታይባቸው ብሔራዊ ባንክ ማሳወቁ ይታወሳል

Source: capitalethiopia