ዳሸን ባንክ ለደንበኞቹ ምቾትን ለማሳደግ በሚያስችል አዲስ እርምጃ የፈጠራውን “ዳሸን ሱፐር አፕ” በመጠቀም የኦንላይን የገበያ (ኢ-ኮሜርስ) አገልግሎት መስጠት ጀምሯል።

ይህ አዲስ አገልግሎት ደንበኞች ከቤታቸው ሆነው በቀላሉ የተለያዩ ምርቶችን እንዲገዙ በማድረግ የበዓል እና የዕለት ተዕለት ፍላጎቶቻቸውን ለማሟላት ያለመ ነው።

በዚህ አዲስ የኦንላይን የገበያ አገልግሎት አማካኝነት የዳሸን ባንክ ደንበኞች የበሬ፣ የበግና የዶሮ ሥጋ፣ የወንዶችና የሴቶች ልብሶች፣ ሰዓቶች፣ ቀለበቶች፣ ዘመናዊ የቆዳ ቦርሳዎች፣ ጫማዎችና ሌሎች በርካታ ምርቶችን መግዛት ይችላሉ።

ባንኩ ይህንን አገልግሎት የደንበኞችን የተለያዩ የገበያ ፍላጎቶች ለማሟላትና ስጦታዎችን እንዲሁም አስፈላጊ ነገሮችን በአንድ ቦታ እንዲያገኙ ለማድረግ ያለመ መሆኑን ገልጿል።

ደንበኞች በሚፈልጓቸው ዕቃዎች ላይ በቀላሉ በመምረጥ በዳሸን ሱፐር አፕ በኩል ትዕዛዝ መስጠት ይችላሉ ተብሏል።

ከዚህ የኦንላይን የገበያ አገልግሎት በተጨማሪ ዳሸን ባንክ በቅርቡ በሞባይል መተግበሪያው ላይ ሌሎች በርካታ አዳዲስ አገልግሎቶችን እንደሚያስተዋውቅ የገለጸ ሲሆን ይህም በዲጂታል የባንክ አገልግሎትና የደንበኞች ምቾት አቅርቦቱን የበለጠ እንደሚያሳድገው ይጠበቃል።

ቅዳሜገበያ