ይህም በቀዳሚው በጀት ዓመት ከተገኘው ትርፍ ጋር ሲነጻጸር የ16.6 በመቶ ዕድገት አለው ብሏል፡፡
ኩባንያው በዓመታዊው ሪፖርቱ ከኢንቨስትመንት የተገኘው ገቢ መጨመር ለዕድገቱ አዎንታዊ አስተዋጽኦ አለው ሲል አስረድቷል፡፡
ናይል ኢንሹራንስ በበጀት ዓመቱ ከጠቅላላ፣ ከረዥም ጊዜ እና ከታካፉል መድን በድምሩ 1.26 ቢሊዮን ብር የመድን ገቢ ማግኘቱን ጠቅሷል።
ይህ ከቀዳሚው በጀት ዓመት ጋር ሲነጻጸር የ0.8 በመቶ ዕድገት አለው ብሏል፡፡
ኩባንያው በበጀት ዓመቱ በአጠቃላይ የከፈለው የመድን አገልግሎት ወጪ 986.7 ሚሊዮን ብር ደርሷል ሲል በሪፖርቱ አስፍሯል፡፡
ይህ ወጪ የካሳ ክፍያዎች፤ ከውልና ከካሳ ክፍያ ጋር ቀጥተኛ ግንኙነት ያላቸው የሥራ ክፍሎች ደመወዝ፣ እንዲሁም ለመድን ወኪሎችና ደላላዎች የተከፈለ የኮሚሽን ክፍያ ያካትታል ሲልም አስረድቷል፡፡
ወጪው ከቀዳሚው አመት ጋር ከተመዘገበው ጋር ሲነጻጸር የ54.4 በመቶ ጭማሪ ያሳያል፡፡
ለወጪው መጨመር በዋነኝነት የተሽከርካሪ የመለዋወጫ ዋጋ፣ የእጅ ሥራ ዋጋ፤ የክሬን አገልግሎት እና የሕክምና ወጪዎች በከፍተኛ መጠን በመጨመራቸው ምክንያት ነው ይላል ሪፖርቱ፡፡
ናይል ኢንሹራንስ በ2017 በጀት ዓመት ከኢንቨስትመንት 363.3 ሚሊዮን ብር አግኝቻለሁ ያለ ሲሆን በቀዳሚው ዓመት የተመዘገበው 249.3 ሚሊዮን ብር እንደነበር አስታውሷል፡፡
በተጠናቀቀው በጀት ዓመት አጠቃላይ የኩባንያው ዕዳ 3.5 ቢሊዮን ብር ደርሷል ተብሏል።
ይህ ከቀዳሚው ዓመት ጋር ሲነጻጸር የ45.8 በመቶ ዕድገት አሳይቷል፡፡
ይህም የጨመረበት ዋነኛ ምክንያት የመድን ኮንትራቶች ግዴታዎች(ላልተከፈሉ የካሳ ክፍያዎች የተያዘው መጠባበቂያ) በመጨመሩ ነው ተብሏል፡፡
ኩባንያው ጠቅላላ ሀብቱ 5.7 ቢሊዮን ብር ፣የተከፈለ ካፒታሉ ደግሞ 1.25 ቢሊዮን ብር መድረሱን ከሪፖርቱ ላይ ተመልክተናል፡፡