በዓለም አቀፍ የሙዚቃ ኢንዱስትሪ ውስጥ ስሟ በጉልህ የሚነሳው ኢትዮጵያ ሀብተማርያም፣ የታዋቂው የBTS አሳታሚ HYBE America የሙዚቃ ዘርፍ ፕሬዝዳንት በመሆን ተሹማለች።
በዚህ ስራዋ ኢትዮጵያ በሎስ አንጀለስ እና የአሜሪካ የሙዚቃ ማዕከል በሆነችው አትላንታ ላይ መሰረቷን በማድረግ ስራዋን የምትሰራ ሲሆን በኩባንያው ስር ያሉ የሙዚቃ አሳታሚዎችን የመምራት፣ አዳዲስ ተሰጥኦዎችን የመመልመል እና የኩባንያውን የንግድ እድሎች የማስፋት ስራንም ታከናውናለች።
ይህ ሹመት HYBE በአሜሪካ ያለውን ተደራሽነት ለማጠናከር እና የጥቁር አሜሪካውያንን (R&B እና Hip-Hop) ባህል ከዓለም አቀፉ ገበያ ጋር ለማስተሳሰር ያለመ ነው።
ኢትዮጵያ ሀብተማርያም የታዋቂውን Motown Records በሊቀመንበርነት እና በዋና ስራ አስፈጻሚነት መርታለች።
እንደ Lil Baby, Migos, Lil Yachty እና City Girls ያሉ ዝነኛ አርቲስቶችን በማሳደግ ረገድ ትልቅ ስራ ሰርታለች።
በUniversal Music Group ውስጥ በቆየችባቸው 20 ዓመታት ከነ Justin Bieber, J. Cole እና Chris Brown ጋር ሰርታለች።
የHYBE America ዋና ስራ አስፈጻሚ አይዛክ ሊ፦ “ኢትዮጵያ በሙዚቃው ዓለም ላይ ያላት እይታ እና ስልታዊ ብልህነት ወደር የማይገኝላት ያደርጋታል” ሲሉ አድንቀዋታል።
ኢትዮጵያ በበኩሏ፦ “HYBE አርቲስቶችን እና አድናቂዎችን የሚያገናኝበት መንገድ ለረጅም ጊዜ ስታዘበው የነበረ ድንቅ ስራ ነው። በዚህ ጉዞ ውስጥ የራሴን ልምድ ለማበርከት በመመረጤ ደስተኛ ነኝ” ብላለች።