የአያቶላህ አሊ ኻሜኒን ተተኪ ለመሰየም ከስምምነት ላይ ተደረሰ

በመካከለኛው ምስራቅ የተቀሰቀሰው መጠነ-ሰፊ ጦርነት ሁለተኛ ሳምንቱን ሲያስቆጥር፣ ቀጣናው ከዚህ ቀደም ታይቶ በማያውቅ የፖለቲካ ውጥረት ውስጥ ይገኛል።

አሜሪካ እና እስራኤል በኢራን ላይ የከፈቱት ጥቃት መጠናከሩን ተከትሎ፣ የኢራን ከፍተኛ የሊቃውንት ጉባኤ የአያቶላህ አሊ ኻሜኒን ተተኪ ለመሰየም ከስምምነት ላይ መድረሱ ተሰምቷል።

ሆኖም እስራኤል መራጮችንም ሆነ ተመራጩን መሪ አድኖ ከመግደል ወደኋላ እንደማትል በይፋ በማስጠንቀቅ “የአደን” ዘመቻዋን ቀጥላለች።

ፕሬዝዳንት ዶናልድ ትራምፕ በስምንት ቀናት ውስጥ 42 የኢራን የጦር መርከቦች መውደማቸውንና የአገሪቱ አየር ኃይል መዳከሙን ገልጸው፣ ጦርነቱ የሚቆመው ኢራን ያለ ቅድመ ሁኔታ እጅ ስትሰጥ ብቻ እንደሆነ በፅኑ አስታውቀዋል።

ግጭቱ ወደ ጎረቤት አገራትም በመስፋፋቱ በዱባይ አውሮፕላን ማረፊያ አቅራቢያ የድሮን ጥቃት የተፈጸመ ሲሆን፣ የኢራኑ ፕሬዝዳንት ማስዑድ ፔዜሽኪያን በስህተት ጥቃት ለደረሰባቸው ጎረቤቶች ይቅርታ ጠይቀዋል።

በአንጻሩ አሜሪካ የጦር መሣሪያ ምርቷን በአራት እጥፍ ለማሳደግ ስምምነት ላይ የደረሰች ሲሆን፣ የተመድ ዋና ጸሐፊ አንቶኒዮ ጉቴሬዝ ሁኔታው ከቁጥጥር ውጪ ሊወጣ እንደሚችል በማሳሰብ አስቸኳይ የዲፕሎማሲ ንግግር እንዲጀመር ጥሪ አቅርበዋል።