የብሔራዊ ባንክ መመሪያ ማሻሻያ

የኢትዮጵያ ብሔራዊ ባንክ በውጭ ምንዛሪ መመሪያው ላይ ባደረገው አዲስ ማሻሻያ፣ የውጭ ምንዛሪ ቢሮዎች ለሥራ ማስጀመሪያነት በዝግ ሒሳብ አስይዘውት የነበረው 30 ሚሊዮን ብር እንዲመለስላቸው ወሰነ።

ይህ ውሳኔ በአሁኑ ወቅት ወደ ሥራ የገቡ 13 የውጭ ምንዛሪ ቢሮዎች የገጠማቸውን የካፒታል እጥረት ለመቅረፍና የሥራ እንቅስቃሴያቸውን ለማቀላጠፍ ትልቅ ፋይዳ እንዳለው ተገልጿል።

ቢሮዎቹ ፈቃድ በሚያወጡበት ወቅት ይህን ከፍተኛ መጠን ያለው ገንዘብ ማስያዝ ግዴታ ሆኖባቸው የቆየ ቢሆንም፣ አዲሱ ማሻሻያ ግን ቢሮዎቹ ገንዘቡን አንቀሳቅሰው ለገበያ ትስስርና ለዕለታዊ ግብይት እንዲያውሉት ዕድል ሰጥቷቸዋል።

የዘርፉ ተዋንያን የተደረገው ማሻሻያ አበረታች መሆኑን ገልጸው፣ በቀጣይም የውጭ ምንዛሪ ገበያውን ይበልጥ ነፃና ተወዳዳሪ የሚያደርጉ ተጨማሪ ማሻሻያዎችን እንደሚጠብቁ ጠቁመዋል።