ሲንቄ ባንክ የፋይናንስ ተደራሽነትን ለማሳደግ በሚያደርገው ጥረት አካል የሆነውን የማስተር ካርድ አገልግሎት በይፋ ማስጀመሩን አስታውቋል።

ባንኩ ይህን አገልግሎት በስፋት ለማቅረብ ከማስተር ካርድ ድርጅት ጋር የአምስት ዓመት የስትራቴጂክ ስምምነት ተፈራርሟል።

ስምምነቱ ሲንቄ ባንክ የማስተር ካርድ ቅድመ ክፍያ ካርዶችን (prepaid cards) ማውጣት እንዲችል የሚያስችለው ሲሆን፣ ባንኩ ከፒ.ኤስ.ኤስ. (PSS) ዋና አውታረ መረብ ውጪ ይህን አገልግሎት የጀመረ የመጀመሪያው አባል ያልሆነ ባንክ መሆኑም ተገልጿል።

ፒ.ኤስ.ኤስ. እንዳለው፣ ይህ ስኬት አገልግሎታቸውን ከአባል ባንኮች ውጪም በማስፋፋት ለፋይናንስ ዘርፉ ያላቸውን አስተዋጽኦ የሚያሳይ ነው።

የማስተር ካርድ አገልግሎቱ በተለይም ወደ ውጭ ለሚጓዙ ደንበኞች አስተማማኝ እና ዓለም አቀፍ ተቀባይነት ያለው የክፍያ አማራጭ እንደሚሆን ተጠቁሟል።

የስምምነቱ መፈረም ሥነ-ሥርዓት በሲንቄ ባንክ ፕሬዝዳንት አቶ ንዋይ መገርሳ እና ከሁለቱም ተቋማት የተወከሉ ከፍተኛ አመራሮች በተገኙበት ተከናውኗል።

CapitalNews