“ጫካ ቡና” ስምንተኛ ቅርንጫፉን በቦሌ ዓለም አቀፍ አየር መንገድ ከፈተ

ከፍተኛ ጥራት ባለው የቡና አቅርቦት የሚታወቀው “ጫካ ቡና”፣ የ10 ዓመት የኢትዮጵያ የቡና ገበያ ቆይታውን ባስመዘገበበት ወቅት፣ ስምንተኛ ቅርንጫፉን በቦሌ ዓለም አቀፍ አየር መንገድ ቅጥር ግቢ ውስጥ በይፋ አስመርቋል።

ይህ አዲስ ቅርንጫፍ  በየቀኑ በርካታ ዓለም አቀፍ መንገደኞችን በሚያስተናግደው የኢትዮጵያ አየር መንገድ ቅጥር ግቢ ውስጥ መሆኑ ለድርጅቱ ልዩ ስኬት ተደርጎ ይቆጠራል ተብሏል።

በምረቃው የስነስርዓት ላይ የኢትዮጵያ አየር መንገድ የደንበኞች አገልግሎት ምክትል ፕሬዝዳንት አቶ ሳምሶን አረጋን ጨምሮ ሌሎች ጥሪ የተደረገላቸው እንግዶች እና የኩባንያው አመራሮች ተገኝተዋል።

የኢትዮጵያ አየር መንገድ ድጋፍ እና የምርጫው ምክንያቶች የኢትዮጵያ አየር መንገድ የደንበኞች አገልግሎት ምክትል ፕሬዝዳንት የሆኑት አቶ ሳምሶን አረጋ እንደተናገሩት፣ “ጫካ ቡና” በአየር መንገዱ ግቢ ውስጥ አገልግሎት መስጠት መጀመሩ መንገደኞች “ወደ አገራችን ሲገቡም ሆነ ሲወጡ የኢትዮጵያን ትክክለኛ ጣዕም እንዲያገኙ” ያስችላል ብለዋል።

በተጨማሪም፣ ከፍተኛ ጥራት ያለው የቡና አገልግሎት መቅረቡ የደንበኞችን እርካታ እንደሚያሳድግ ገልጸው፣ ኩባንያው ስምንተኛ ቅርንጫፉን በእነሱ ግቢ መክፈቱ በጎ ጅማሮ  እንደሆነ አስረድተዋል።

የጫካ ቡና መስራች እና ባለቤት አቶ ብስራት በላይ በበኩላቸው፣ “አየር መንገድ የኢትዮጵያ ትልቁ ብራንድ ነው፤ እዚያ ላይ መክፈታችን ለጫካ ቡና ትልቅ ስኬት ነው” ሲሉ፣ በአየር መንገዱ ግቢ ውስጥ መገኘቱ ዓለም አቀፍ እውቅና ለማግኘት ልዩ ትርጉም እንደሚሰጥ ገልፀዋል።

አቶ ብስራት  በምረቃው ስነስርአት ላይ እንዳስታወቁት፣ ጫካ ቡና ከአገር ውስጥ አገልግሎት ባሻገር ወደ ውጭ ንግድ ለመግባት ዝግጅቱን አጠናቅቋል። በተለይም፣ ድርጅቱ ጥሬ ቡናን ከመላክ ይልቅ እሴት የተጨመረበት (የተቆላ እና የታሸገ) ቡና ለዓለም ገበያ ለማቅረብ አቅዷል። ለዚህም ዓላማ ሲባል በ3,000 ካሬ ሜትር ላይ ያረፈ ዘመናዊ መጋዘን መገንባቱን የገለጹት አቶ ብስራት፣ በሚቀጥሉት ሁለት ወራት ውስጥ ምርት ወደ ውጭ መላክ እንደሚጀምሩ አመልክተዋል።

በተጨማሪም ጫካ ቡና በቀጣይ ዓመታት ውስጥ የዶሮ እርባታ ዘርፍን ለመቀላቀል ዕቅድ አለው። ኩባንያው በቀን እስከ 50,000 ዶሮዎችን እና እንቁላል በማምረት በገበያው ያለውን ውድነት ለማቃለል ማቀዱን አቶ ብስራት ገልጸዋል።

የቦሌ ዓለም አቀፍ አየር መንገድ ተርሚናልን ጨምሮ፣ ጫካ ቡና በአዲስ አበባ በሚከተሉት ስፍራዎች ይገኛል፦

• 📌 ሃያሁለት
• 📌 ቦሌ – ሞርንግ ስታር ህንጻ
• 📌 ቦሌ – አለም ሲኒማ ጀርባ
• 📌 አዲስ አበባ ስታዲየም
• 📌 ብሔራዊ አካባቢ፣ ራስ ኦላ ማዲያ
• 📌 ለገሃር – አቢሲኒያ ባንክ ህንጻ ስር
• 📌 የተባበሩት – አዲስ ኮንቬንሽን

ጫካ ቡና በቡና ኢንዱስትሪው ውስጥ ያሳለፈውን የ10 ዓመት ልምድ በመጠቀም እና በዘመናዊ የንግድ ስትራቴጂ ተደግፎ፣ የኢትዮጵያን ቡና ጣዕም በዓለም አቀፍ ደረጃ ለማስተዋወቅ ትልቅ ምዕራፍ ከፍቷል።